ប្រធានាធិបតីអាមេរិកលោក Donald Trump កាលពីថ្ងៃចន្ទ (ទី២០ ខែមករា) បាននិយាយថា សហរដ្ឋអាមេរិក ចាំបាច់ត្រូវគ្រប់គ្រងដែនដី Greenland ដើម្បីធានាសន្តិសុខអន្តរជាតិ។

លោក Trump បានធ្វើការអត្ថាធិប្បាយបែបនេះ ខណៈពេលដែលចុះហត្ថលេខាលើក្រឹត្យ នៅក្នុងការិយាល័យ Oval Office របស់សេតវិមាន នៅថ្ងៃដំបូងនៃអាណត្តិទី២ របស់លោក ជាប្រធានាធិបតី។

លោក Trump បានបង្ហាញចំណាប់អារម្មណ៍ ក្នុងការធ្វើឲ្យ Greenland ដែលជាដែនដីស្វយ័តរបស់ប្រទេសដាណឺម៉ាក ក្លាយជាផ្នែកមួយរបស់សហរដ្ឋអាមេរិក ចាប់តាំងពីលោក បានជាប់ឆ្នោតឡើងវិញ ក្នុងខែវិច្ឆិកា។ លោកមិនបានច្រានចោលពីការប្រើអំណាចយោធា ឬសេដ្ឋកិច្ច ដើម្បីបញ្ចុះបញ្ចូលដាណឺម៉ាកឲ្យប្រគល់ដែនដីនេះទៅអាមេរិក។

នាយករដ្ឋមន្រ្តីដែនដី Greenland លោក Mute Egede ដែលបានជំរុញឲ្យមានឯករាជ្យភាព បាននិយាយម្តងហើយម្តងទៀតថា កោះនេះ មិនមែនសម្រាប់លក់នោះទេ ហើយថា មានតែប្រជាជនរបស់ដែនដីនេះប៉ុណ្ណោះជាអ្នកសម្រេចពីអនាគតរបស់ពួកគេ៕