ប្រធានាធិបតីស្តីទីកូរ៉េខាងត្បូង លោក Choi Sang-mok នៅថ្ងៃអង្គារ (ទី២១ ខែមករា) នេះ បាននិយាយថា លោករំពឹងមានទំនាក់ទំនងទ្វេភាគីជាមួយទីក្រុងវ៉ាស៊ីនតោន ដែលជួយអភិវឌ្ឍគ្នាទៅវិញទៅមក ក្រោមរដ្ឋបាលរបស់លោក Donald Trump ដោយលើកឡើងពីក្ដីបារម្ភ អំពីថា តើគោលនយោបាយរបស់សហរដ្ឋអាមេរិក អាចនឹងប៉ះពាល់ដល់សេដ្ឋកិច្ចធំជាងគេបំផុតទី៤ របស់អាស៊ីយ៉ាងដូចម្ដេច។

លោក Choi បាននិយាយថា «រដ្ឋាភិបាលនឹងខិតខំពង្រឹងបន្ថែមទៀតនូវកិច្ចសហប្រតិបត្តិការគោលនយោបាយជាមួយសហរដ្ឋអាមេរិក និងលើកកម្ពស់ផលប្រយោជន៍គ្នាទៅវិញទៅមក ដោយផ្អែកលើតម្លៃរួមនៃសម្ព័ន្ធភាពកូរ៉េ-សហរដ្ឋអាមេរិក» ដោយលោកបានលើកឡើងពីពាក្យស្លោករបស់សម្ព័ន្ធភាព «We Go Together» (យើងធ្វើដំណើរទៅជាមួយគ្នា)។

លោក Choi បានបន្តទៀតថា លោកនឹងស្វែងរកការសន្ទនាតាមទូរសព្ទជាមួយប្រធានាធិបតីអាមេរិក Donald Trump ឲ្យបានលឿនបំផុតតាមដែលអាច ពោលគឺប៉ុន្មានម៉ោងបន្ទាប់ពីលោក Trump បានស្បថចូលកាន់តំណែងជាប្រធានាធិបតីទី៤៧ របស់សហរដ្ឋអាមេរិក ដែលជាអាណត្តិទី២ របស់លោក។

លោក Choi ដែលជារដ្ឋមន្ត្រីហិរញ្ញវត្ថុ បានកាន់តំណែងជាប្រធានាធិបតីស្តីទី ចាប់តាំងពីថ្ងៃទី២៧ ខែធ្នូ ដោយព្យាយាមដឹកនាំប្រទេសកូរ៉េខាងត្បូងឆ្លងកាត់វិបត្តិនយោបាយដ៏អាក្រក់បំផុតមិនធ្លាប់មាន ក្នុងរយៈពេលជាច្រើនទសវត្សរ៍មកនេះ បន្ទាប់ពីមានការចោទប្រកាន់ទម្លាក់តំណែងនាយករដ្ឋមន្ត្រី លោក Han Duck-soo និងប្រធានាធិបតី លោក Yoon Suk Yeol ពាក់ព័ន្ធនឹងការប៉ុនប៉ងរយៈពេលខ្លីរបស់លោក Yoon ដើម្បីដាក់ច្បាប់អាជ្ញាសឹក កាលពីថ្ងៃទី៣ ខែធ្នូ។

លោក Trump ដែលបានសន្ទានាតាមទូរសព្ទរយៈពេល ១២នាទីជាមួយលោក Yoon មួយថ្ងៃបន្ទាប់ពីលោកទទួលបានជ័យជម្នះក្នុងការបោះឆ្នោតប្រធានាធិបតីខែវិច្ឆិកានោះ មិនបានជជែកតាមទូរសព្ទជាមួយលោក Han ឬលោក Choi ទេ។ នៅព្រឹកថ្ងៃអង្គារ លោក Choi បានអបអរលោក Trump នៅថ្ងៃប្រារព្ធពិធីស្បថចូលកាន់តំណែងរបស់លោក តាមរយៈការបង្ហោះនៅលើបណ្ដាញសង្គម X ដោយសរសេរថា «សាធារណរដ្ឋកូរ៉េទន្ទឹងរង់ចាំធ្វើឲ្យសម្ព័ន្ធភាពអស្ចារ្យម្តងទៀត»។

លោក Cho Hyun-dong ឯកអគ្គរដ្ឋទូតកូរ៉េខាងត្បូង ប្រចាំនៅសហរដ្ឋអាមេរិក បានចូលរួមក្នុងពិធីឡើងកាន់តំណែងរបស់លោក Trump៕