លោក Zheng Renyi អ្នកជំនាញនៃមជ្ឈមណ្ឌលសម្រាប់ការសិក្សារុស្ស៊ីនៅសាកលវិទ្យាល័យ East China Normal University ក្នុងទីក្រុងសៀងហៃ បានប្រាប់សារព័ត៌មាន TASS ថា សហរដ្ឋអាមេរិក នឹងមិនអាចដោះស្រាយជម្លោះអ៊ុយក្រែន ក្នុងរយៈពេលដ៏ខ្លីបានទេ បើទោះបីជាមានសេចក្តីថ្លែងការណ៍ពីមុនរបស់លោក ដូណាល់ ត្រាំ ( Donald Trump) អំពីឆន្ទៈរបស់លោក ក្នុងការធ្វើដូច្នេះ យ៉ាងឆាប់រហ័សក៏ដោយ។

អ្នកជំនាញបានចង្អុលបង្ហាញថា៖« លោក ត្រាំ មានឆន្ទៈក្នុងការបញ្ចប់ជម្លោះរុស្ស៊ី-អ៊ុយក្រែន នោះប្រាកដណាស់។ ទោះបីជាយ៉ាងណាក៏ដោយ ការអះអាងមុនរបស់លោកដែលថា លោកនឹងដោះស្រាយជម្លោះក្នុងរយៈពេល ២៤ ម៉ោង មើលទៅហាក់ដូចជាលិខិតឥណទានដែលគ្មានមូលដ្ឋាន និងទទេ។ ពុំមានឱកាសទេនៅពេលនេះដែលថា សហរដ្ឋអាមេរិកនឹងអាចដោះស្រាយបញ្ហានេះ ក្នុងរយៈពេលខ្លីនោះ។

លើសពីនេះ តាមការលើកឡើងរបស់លោក Zheng សហរដ្ឋអាមេរិក និងអង្គការណាតូ មិនអាចទុកចិត្តបានក្នុងនាមជាអ្នកសម្រុះសម្រួលទេ ពីព្រោះពួកគេជាប់ពាក់ព័ន្ធយ៉ាងខ្លាំង នៅក្នុងជម្លោះ។ "ចំពោះជម្លោះរុស្ស៊ី-អ៊ុយក្រែនផ្ទាល់ តាមពិតទៅ លោក ត្រាំ ខ្វល់ខ្វាយតិចតួចអំពីជម្លោះនេះ។ ការផ្តោតអារម្មណ៍របស់លោក គឺអំពីរបៀបកាត់បន្ថយសម្ពាធលើសហរដ្ឋអាមេរិក ស្វែងរកមធ្យោបាយសម្រាប់សហរដ្ឋអាមេរិក ដើម្បីចេញពីស្ថានភាពនេះ និងកាត់បន្ថយការខូចខាតដល់ផលប្រយោជន៍របស់សហរដ្ឋអាមេរិក។ ចំណុចចាប់ផ្តើម និងគោលដៅទាំងនេះ មិនអាចជួយសម្រួលដល់ដំណោះស្រាយពិតប្រាកដ រហ័ស និងមានប្រសិទ្ធភាពចំពោះជម្លោះនោះទេ។