លោកស្រី Stephanie Koury តំណាងពិសេសរបស់អង្គការសហប្រជាជាតិទទួលបន្ទុកប្រទេសលីប៊ី កាលពីថ្ងៃចន្ទ បានជួបជាមួយប្រធានសភាតំណាងរាស្រ្តដែលមានមូលដ្ឋាន នៅភាគខាងកើត លោក Aguila Saleh ដែលពួកគេបានសង្កត់ធ្ងន់លើសារៈសំខាន់នៃដំណើរការដ៏ទូលំទូលាយមួយ ដែលនាំទៅដល់ការរៀបចំការបោះឆ្នោត នៅក្នុងប្រទេស។

លោកស្រី Koury បានបង្ហោះនៅលើវេទិកាប្រព័ន្ធផ្សព្វផ្សាយសង្គម Xថា៖«យើងបានសង្កត់ធ្ងន់លើសារៈសំខាន់នៃដំណើរការដ៏ទូលំទូលាយមួយ ដែលត្រួសត្រាយផ្លូវទៅកាន់ការបោះឆ្នោតជាតិ និងការបង្កើត   ស្ថាប័នបង្រួបបង្រួមរឹងមាំ និងស្របច្បាប់ រួមទាំងរដ្ឋាភិបាលមួយ ដែលអាចគ្រប់គ្រងទូទាំងប្រទេស និងបម្រើប្រជាជនលីប៊ីទាំងអស់។ 

មន្ត្រីទាំងពីរ ក៏បានពិនិត្យស្ថានភាពសិទ្ធិមនុស្ស ដោយលើកឡើងពីតម្រូវការសំខាន់សម្រាប់នីតិរដ្ឋ និងគណនេយ្យភាព។

លោកស្រី Koury បានសម្តែងការកោតសរសើរប្រធានសភា លោក Saleh ចំពោះការប្តេជ្ញាចិត្តរបស់លោក ក្នុងការសហការជាមួយបេសកកម្មគាំទ្ររបស់អង្គការសហប្រជាជាតិ នៅក្នុងប្រទេសលីប៊ី លើ «ច្បាប់បង្រួបបង្រួមជាតិដែលផ្អែកលើសិទ្ធិ និងជនរងគ្រោះជាមជ្ឈមណ្ឌល» ។

ប្រទេសលីប៊ីបានបរាជ័យក្នុងការរៀបចំការបោះឆ្នោតទូទៅ ក្នុងខែធ្នូ ឆ្នាំ ២០២១ ដូចដែលបានគ្រោងទុកពីមុនមក ដោយសារតែការខ្វែងគំនិតគ្នា ក្នុងចំណោមភាគីលីប៊ី ជុំវិញច្បាប់បោះឆ្នោត។