លោក Donald Trump បានផ្អាកគោលនយោបាយដំឡើងពន្ធលើប្រទេសចិនដ៏គួរឲ្យភ្ញាក់ផ្អើល នៅថ្ងៃដំបូងដែលលោកវិលត្រលប់ទៅសេតវិមានវិញ ហើយមិនបានចាត់ទុកប្រទេសនេះថា ជាការគំរាមកំហែងនោះឡើយ ដោយធ្វើឲ្យលទ្ធភាពមានកាន់តែខ្ពស់ពីការស្រុះស្រួលគ្នាឡើងវិញ ខណៈដែលភាគីទាំង២ សម្លឹងដល់ការទាញយកប្រយោជន៍ពីការមានសហប្រតិបត្តការជាមួយគ្នា ជាជាងការបង្កផលអាក្រក់ ដោយសាការទុកគ្នាជាសត្រូវ។

នៅក្នុងសុន្ទរកថាបន្ទាប់ពីស្បថចូលកាន់តំណែង លោកប្រធានាធិបតីអាមេរិកថ្មី បានបដិសេធមិននិយាយឡើយ អំពីប្រទេសចិនដែលជាគូប្រជែងពីមុនរបស់ខ្លួន នៅក្នុងសង្គ្រាមពាណិជ្ជកម្ម បើទោះបីជាលោក បានលើកឡើងថា ពន្ធគយនឹងធ្វើឲ្យសហរដ្ឋអាមេរិក «ក្លាយជាប្រទេសអ្នកមានស្ដុកស្ដម្ភ» ក៏ដោយ ដោយឥរិយាបថនេះទុកផ្លូវឲ្យមានការចរចាថ្មីៗជាមួយប្រទេសសេដ្ឋកិច្ចធំជាងគេបំផុតទី២ របស់ពិភពលោកមួយនេះ។

ហើយជាមួយគ្នានេះ លោក Trump ក៏បានពន្យារពេលការហាមប្រាមលើកម្មវិធីវីដេអូខ្លី TikTok ដែលគ្រប់គ្រងដោយប្រទេសចិន ប៉ុន្តែនៅក្នុងការចំណាត់ការដែលមិនធ្លាប់មានពីមុនមក បានស្នើថា សហរដ្ឋអាមេរិកគួរតែបានក្លាយជាម្ចាស់កម្មសិទ្ធិពាក់កណ្ដាលលើអាជីវកម្មរបស់ TikTok ដើម្បីជាថ្នូរធ្វើឲ្យកម្មវិធីនេះនៅតែមានដំណើរការ នៅសហរដ្ឋអាមេរិក ដោយនិយាយថា ក្រុមហ៊ុនអាចមានតម្លៃរាប់រយពាន់លានដុល្លារ។

បណ្ដាអ្នកវិភាគ បានលើកឡើងថា នៅពេលលោក Trump ចាប់ផ្តើមអាណត្តិទី២ ទីក្រុងប៉េកាំង និងវ៉ាស៊ីនតោន យល់ថា ពួកគេត្រូវការផែនទីបង្ហាញផ្លូវថ្មីមួយ ដើម្បីជំរុញគោលដៅ និងការពារផលប្រយោជន៍របស់ប្រទេសទាំង២ ទោះបីជាបញ្ហាដែលមិនទាន់ត្រូវបានដោះស្រាយពីមុន ដូចជាកិច្ចព្រមព្រៀងពាណិជ្ជកម្មឆ្នាំ២០២០ ជាដើម អាចប៉ះពាល់យ៉ាងខ្លាំងដល់បរិយាកាសអំណោយផលនាពេលបច្ចុប្បន្នក៏ដោយ។

គួររំលឹកថា ក្នុងអាណត្តិដំបូងរបស់លោក លោក Trump បានបង្កើនទំនាក់ទំនងយ៉ាងឆាប់រហ័សភ្លាមៗជាមួយប្រធានាធិបតីចិន លោក ស៊ី ជីនពីង (Xi Jinping)។ មេដឹកនាំកំពូលទាំង២ បានធ្វើម្ចាស់ផ្ទះស្វាគមន៍គ្នាទៅវិញទៅមក ក្នុងរដ្ឋ Florida និងទីក្រុងប៉េកាំង។ ប៉ុន្តែកាំធ្វើបែបនោះមិនបានជួយបញ្ឈប់ទំនាក់ទំនងដែលមានសភាពកាន់តែអាក្រក់ទៅៗ ក្នុងសង្រ្គាមពាណិជ្ជកម្មដែលឃើញមានការបញ្ចេញការដំឡើងពន្ធសងសឹកគ្នាជាបន្តបន្ទាប់ និងដែលរំខានដល់ខ្សែច្រវាក់ផ្គត់ផ្គង់សកល។

តែយ៉ាងណាក៏ដោយ ភាគីទាំង២ ហាក់ដូចជាមិនចង់បន្តជម្លោះនោះឡើយ ដោយបង្ហាញសញ្ញាឆ្ពោះទៅកាន់តុចរចាជំនួសវិញ៕