លទ្ធផលនៃការស្ទង់មតិមតិមួយ ដែលបានផ្សាយឲ្យដឹងកាលពីយប់ថ្ងៃចន្ទ (ទី២០ ខែមករា) បានបង្ហាញថា បេក្ខជនប្រធានាធិបតីស្តាំនិយមជ្រុលរ៉ូម៉ានី លោក Calin Georgescu នៅតែជាជម្រើសទី១ របស់អ្នកបោះឆ្នោត នៅមុនព្រឹត្តិការណ៍បោះឆ្នោតឡើងវិញ ដើម្បីជ្រើសរើសប្រធានាធិបតី ក្នុងខែឧសភា។

ការស្ទង់មតិនេះធ្វើឡើងមួយខែ បន្ទាប់ពីតុលាការកំពូលរបស់រដ្ឋសហភាពអឺរ៉ុប បានលុបចោលការបោះឆ្នោតប្រធានាធិបតីដែលលោក Georgescu គឺជាអ្នកនាំមុខគេ ដោយមានរយៈពេល ២ថ្ងៃ នៅមុនការរៀបចំជុំទី២ ដោយលើកឡើងពីការចោទប្រកាន់ ដែលថា មានការជ្រៀតជ្រែករបស់រុស្ស៊ី ដើម្បីជួយលោក។

ការលុបចោលនេះ បានកើតឡើងបន្ទាប់ពីឯកសាររដ្ឋបង្ហាញថា អ្នករិះគន់អង្គការណាតូ គឺលោក Georgescu ដែលបានសរសើរមេដឹកនាំហ្វាស៊ីសនិយមរបស់រ៉ូម៉ានី ក្នុងទសវត្សរ៍ឆ្នាំ១៩៣០ បានទទួលផលពីយុទ្ធនាការលើបណ្ដាញសង្គមមិនត្រឹមត្រូវដែលទំនងជាត្រូវបានរៀបចំឡើងដោយប្រទេសរុស្ស៊ី ជាការចោទប្រកាន់ ដែលទីក្រុងម៉ូស្គូបានបដិសេធ។

យ៉ាងណាក្ដី ដោយត្រូវបានធ្វើឡើងដោយស្ថាប័នស្ទង់មតិ Avangarde និងត្រូវបានដកស្រង់ដោយគេហទំព័រព័ត៌មានអនឡាញ Hotnews.ro ការស្ទង់មតិបានបង្ហាញថា លោក Georgescu ទទួលបានសំឡេងគាំទ្រ ៣៨ភាគរយនៃការបោះឆ្នោត នៅក្នុងជុំទី១ នាថ្ងៃទី៤ ខែឧសភា។

ចំណែកលោក Crin Antonescu ដែលជាបេក្ខជនស្នើឡើងតែម្នាក់គត់របស់រដ្ឋាភិបាលចម្រុះគាំទ្រអឺរ៉ុប នឹងទទួលបានសំឡេងបោះឆ្នោតគាំទ្រ ២៥ភាគរយ តាមមកដោយអភិបាលក្រុង Bucharest លោក Nicusor Dan ដែលបាននិយាយថា លោកអាចឈរឈ្មោះជាបេក្ខជនឯករាជ្យដែលនឹងទទួលបានសំឡេង ១៧ភាគរយ។

រីឯលោកស្រី Elena Lasconi មេដឹកនាំបក្សប្រឆាំងនិយមកណ្តាល គឺគណបក្ស Save Romania Union ដែលទទួលបានជោគជ័យឆ្លងចូលជុំទី២ ជាមួយលោក Georgescu មុនពេលត្រូវបានប្រកាសលុបចោលនោះ នឹងទទួលបានសំឡេង ៦ភាគរយ។

គួរបញ្ជាក់ថា ការស្ទង់មតិនេះ បានធ្វើឡើងចំពោះមនុស្ស ១.៣៥៤នាក់ នៅចន្លោះថ្ងៃទី១០ ដល់ថ្ងៃទី១៦ ខែមករា ហើយលទ្ធផលល្អៀងខុសគ្នា ២,៦ភាគរយ។ ការបោះឆ្នោតឡើងវិញ នឹងប្រព្រឹត្តទៅនៅថ្ងៃទី៤ ខែឧសភា ដោយជុំទី២ គឺនៅថ្ងៃទី១៨ ខែឧសភា៕