កម្មវិធីលើកលែងទិដ្ឋាការរបស់ប្រទេសថៃ សម្រាប់ជនជាតិចិន បានស្ថិតនៅក្រោមការពិនិត្យតាមដានយ៉ាងកៀកកិត បន្ទាប់ពីការចោទប្រកាន់ពីការចាប់ជំរិតតារាសម្តែងជនជាតិចិនដ៏ល្បីឈ្មោះម្នាក់ និងឧក្រិដ្ឋកម្មស្រដៀងគ្នានេះ បានបង្កជាក្ដីបារម្ភ ចំពោះវិស័យទេសចរណ៍ និងសន្តិសុខ។

ហេតុការណ៍ពាក់ព័ន្ធនឹងតារាសម្តែង លោក Wang Xing ត្រូវបានចែករំលែកតៗគ្នាយ៉ាងទូលំទូលាយ នៅលើបណ្ដាញសង្គមចិន កាលពីដើមខែនេះ ដែលជំរុញឲ្យនាយករដ្ឋមន្ត្រីថៃ លោកស្រី Paetongtarn Shinawatra (ផែថងថាន ស៊ីសណាវ៉ាត់) ធានាឡើងវិញនូវសុវត្ថិភាពរបស់ភ្ញៀវទេសចរចិន នៅមុនថ្ងៃបុណ្យចូលឆ្នាំថ្មី។

គួរបញ្ជាក់ថា វិស័យទេសចរណ៍ គឺជាកត្តាជំរុញដ៏សំខាន់របស់ប្រទេសមានសេដ្ឋកិច្ចធំជាងគេទី២ របស់តំបន់អាស៊ីអាគ្នេយ៍មួយនេះ ដែលបានកត់ត្រាចំនួនអ្នកទៅលេងកម្សាន្តចំនួន ៣៩,៩លាននាក់ ក្នុងឆ្នាំ២០១៩ មុនពេលជំងឺរាតត្បាតបានប៉ះពាល់ដល់វិស័យនេះ។

នៅឆ្នាំ២០២៣ រដ្ឋាភិបាលបានលុបចោលការតម្រូវឲ្យមានទិដ្ឋាការ សម្រាប់ការចូលប្រទេសរបស់ជនជាតិចិន ដែលជាទីផ្សារប្រភពដ៏ធំបំផុតរបស់ខ្លួន ក្នុងគោលបំណងលើកស្ទួយឧស្សាហកម្មនេះ។ ចាប់តាំងពីពេលនោះមក ការទៅដល់របស់ភ្ញៀវទេសចរបរទេស បានកើនឡើង ២៦ភាគរយ ក្នុងមួយឆ្នាំ ពោលគឺឡើងដល់ ៣៥,៥លាននាក់ ដែលប្រហែលជា ៦,៧៣លាននាក់ បានធ្វើដំណើរពីប្រទេសចិន ដោយកើនឡើង ៩១ភាគរយ។

សមាជិកព្រឹទ្ធសភា លោក Wanchai Ekpornpichit បាននិយាយថា ការកើនឡើងនូវចំនួនភ្ញៀវទេសចរចិន អាចនាំឲ្យមានសកម្មភាពខុសច្បាប់កាន់តែច្រើន ជាពិសេសនៅតាមទីក្រុងជាប់ព្រំដែនប្រទេសឡាវ និងមីយ៉ាន់ម៉ា ដែលបណ្ដាញឧក្រិដ្ឋកម្មដំណើរការមជ្ឈមណ្ឌលឆបោក និងប្រតិបត្តិការល្បែងអនឡាញ។

តែរដ្ឋមន្ត្រីក្រសួងទេសចរណ៍ លោក Sorawong Thienthong បានប្រាប់អ្នកសារព័ត៌មាន កាលពីថ្ងៃទី២១ ខែមករាថា បច្ចុប្បន្ននេះមិនមានគម្រោងពិនិត្យឡើងវិញនូវកម្មវិធីលើកលែងទិដ្ឋាការនេះនោះទេ។ ក្រុមមួយចំនួន ក្នុងឧស្សាហកម្មទេសចរណ៍ថៃ បានស្នើឲ្យកាត់បន្ថយការស្នាក់នៅដោយគ្មានទិដ្ឋាការ សម្រាប់ភ្ញៀវទេសចរចិន ពី ៦០ថ្ងៃ មកត្រឹម ១៥ថ្ងៃ៕