នៅថ្ងៃអង្គារនេះ ជនប៉ាឡេស្ទីនបានតម្រង់ជួរទទួលការផ្គត់ផ្គង់ជំនួយដែលត្រូវបានចែកចាយដោយមជ្ឈមណ្ឌលទីភ្នាក់ងារការងារជំនួយអង្គការសហប្រជាជាតិ(UNRWA) នៅទីក្រុង Khan Younis ស្ថិតក្នុងតំបន់ហ្កាហ្សា ។

 ស្របពេលដែលពួកគេម្នាក់ៗ រង់ចាំទទួលប្រអប់ការផ្គត់ផ្គង់ស្បៀងអាហារ ពលរដ្ឋហ្កាហ្សា និយាយថា ពួកគេមានសង្ឃឹមឡើងវិញ ពេលបទឈប់បាញ់ចូលជាធរមាន ហើយពួកគេសូមអំពាវនាវឲ្យមានជំនួយបន្ថែមទៀតសម្រាប់តំបន់ហ្កាហ្សា ។

 លោក Abu គឺជាពលរដ្ឋហ្កាហ្សាមួយរូបនិយាយថា អ្វីៗចាប់ផ្តើមល្អប្រសើរខ្លះវិញហើយ ពេលដែលបទឈប់បាញ់ចាប់ផ្តើម ។ ពួកយើងសង្ឃឺមថា ពិភពលោកទាំងអស់នឹងឈរខាង UNRWA ។

 ខណៈពេលនោះដែរ ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌(OCHA)និយាយថា រថយន្តដឹកជំនួយ ៩១៥គ្រឿង បានចូលក្នុងតំបន់ហ្កាហ្សាស្រ្ទីបកាលពីថ្ងៃចន្ទ នៅថ្ងៃទី ២នៃបទឈប់បាញ់រវាងអ៊ីស្រាអែល និងក្រុមហាម៉ាស់ ក្រោយសង្រ្គាមរយៈពេល ១៥ខែ ។

 កាលពីថ្ងៃអាទិត្យ UN បាននិយាយថា រថយន្តដឹកជំនួយប្រហែល ៦៣០គ្រឿង បានចូលដែនដីបិទច្រកប៉ាឡេស្ទីនមួយនេះ ក្នុងនោះរថយន្តយ៉ាងហោច ៣០០គ្រឿង បានធ្វើដំណើរទៅកាន់តំបន់ភាគខាងជើង ជាទីដែលក្រុមអ្នកជំនាញព្រមានពីការជិតកើតមានគ្រោះទុរ្ភិក្ស ៕