ជនអន្តោប្រវេសន៍នៅទីក្រុងព្រំដែន Piedras Negras ភាគខាងជើងប្រទេសម៉ិកស៊ិក បានបង្ហាញក្តីកង្វល់របស់ពួកគេ ពេលដែលប្រធានាធិបតីសហរដ្ឋអាមេរិកលោក Donald Trump បានស្បថឡើងកាន់តំណែងកាលពីថ្ងៃចន្ទ ។

ពេលដែលលោក Trump ស្បថចូលកាន់តំណែង អ្នកស្រី Denia Alvarado គឺជាជនអន្តោប្រវេសន៍មួយរូបមកពីប្រទេសហុងឌូរ៉ាស់ ទទួលបានសារអ៊ីម៉ែលសរសេរថា ការណាត់ជួប CBP One របស់គាត់សម្រាប់ថ្ងៃអង្គារនេះ ត្រូវបានលុបចោលហើយ ។ 

អ្នកស្រី និងកូនៗគាត់ ២នាក់ បានរង់ចាំនៅប្រទេសម៉ិកស៊ិក អស់រយៈពេលជាង ១ឆ្នាំមកហើយ សម្រាប់ការណាត់ជួបមួយនេះ ។

អ្នកស្រី Alvarado បានចាកចេញពីប្រទេសហុងឌូរ៉ាស់ ក្រោយទទួលបានការគំរាមកំហែងជាច្រើនលើក ។ អ្នកស្រីនិយាយថា អ្នកស្រីសង្ឃឹមថានឹងទទួលបានសិទ្ធិជ្រកកោននៅសហរដ្ឋអាមេរិក ដើម្បីផ្តល់អនាគតល្អប្រសើរជាងនេះដល់កូនៗរបស់គាត់ ។

នៅតាមទីក្រុងព្រំដែនជាច្រើនរបស់ម៉ិកស៊ិក ជនអន្តោប្រវេសន៍ បានមើលឃើញកម្មវិធីណាត់ជួប CBP One របស់លោក Biden ត្រូវបានលុបចោល ក្រោយពេលលោក Trump ឡើងកាន់តំណែង ។ មនុស្សប្រហេល ២៨ម៉ឺននាក់ បានដាក់ពាក្យរាល់ថ្ងៃ តាមកម្មវិធីមួយនេះ ដើម្បីទទួលបានការណាត់ជួប មកទល់នឹងថ្ងៃទី ៧ ខែមករា ឆ្នាំ ២០២៥ ។

ចំណែកឯអ្នកស្រី Carolina Palmares គឺជាជនអន្តោប្រវេសន៍មកពីប្រទេសវេណេស៊ុយអេឡា បានរង់ចាំទាំងអន្ទះសារដូចគ្នា ដើម្បីមើលថាតើការណាត់ជូប CBP One របស់គាត់នៅថ្ងៃអង្គារនេះ ត្រូវបានគេលុបចោលឬយ៉ាងណា ។

អ្នកស្រី និយាយថា ឥឡូវលោក Donald Trump បានស្បថចូលកាន់តំណែង ដូច្នេះហើយរឿងច្រើនណាស់នឹងកើតមានឡើង ពួកយើងពុំដឹងថាតើស្ថានភាពទៅជាយ៉ាងណានោះទេ ៕