លោក Nael Barghouti គឺជាទណ្ឌិតប៉ាឡេស្ទីនជាប់ពន្ធនាគារអ៊ីស្រាអែលយូរបំផុត ចូលចិត្តដាំដើមក្រូចនៅក្នុងសួនច្បាររបស់គាត់ ប៉ុន្តែគាត់ពុំធ្លាប់ដែលបានទទួលទានវាអស់រយៈពេល ១ទសវត្សរ៍ចុងក្រោយនេះ ។

ត្រូវបានគេគោរពដោយក្រុមជីវពលថាជាព្រឹទ្ធបុរសនៃទណ្ឌិតរបស់ពួកគេ លោក Barghouti ស្ថិតក្នុងចំណោមជនប៉ាឡេស្ទីនជាង ២០០នាក់ ដែលនឹងត្រូវនិរទេសក្រោមកិច្ចព្រមព្រៀងបទឈប់បាញ់ និងការដោះដូរចំណាប់ថ្នូរជាមួយអ្នកទោស ។

ភរិយារបស់គាត់អ្នកស្រី Eman Nafe ធ្លាប់ជាទណ្ឌិតផងដែរជាប់ពន្ធនាគាររយៈពេល ១០ឆ្នាំនៅអ៊ីស្រាអែល សម្រាប់ការចោទប្រកាន់ថាបានរៀបផែនការវាយប្រហារអត្តឃាត ។ អ្នកស្រីនិយាយថា ពួកយើងទទួលបានការបញ្ជាក់ថា ប្តី Nael នឹងត្រូវនិរទេសខ្លួន ។

អ្នកស្រីនិយាយប្រាប់ទីភ្នាក់ងារព័ត៌មានរ៉យទ័រថា អ្នកស្រីមានការតក់ស្លុត និងទុក្ខក្រៀមក្រំជាខ្លាំង ។ ពួកយើងមានការព្រួយបារម្ភ ហើយពួកយើងសង្ឃឹមថា វានឹងមិនកើតឡើងនោះទេ ដោយសារអ្នកស្រីដឹងច្បាស់ថា ប្តីរបស់គាត់មិនអាចទទួលយកបានឡើយការនិរទេសបែបនេះ ។

លោក Nael វ័យ ៦៧ឆ្នាំ បានចំណាយពេល ៤៤ឆ្នាំនៅក្នុងពន្ធនាគារអ៊ីស្រាអែល គឺជារយៈពេលជាប់ពន្ធនាគារយូរជាងជនប៉ាឡេស្ទីណាៗទាំងអស់ ។ ដោយជាប់ពន្ធនាការក្នុងឆ្នាំ ១៩៧៨ សម្រាប់ការសម្លាប់អ្នកបើកបររថយន្តក្រុងអ៊ីស្រាអែល លោកត្រូវបានដោះលែងឲ្យមានសេរីភាពវិញនៅក្នុងឆ្នាំ ២០១១ នៅក្នុងការដោះដូរអ្នកទោសលើកមុន ប៉ុន្តែរយៈពេល ៣ឆ្នាំក្រោយមក លោកត្រូវបានចាប់ខ្លួនម្តងទៀត ហើយនិងជាប់ពន្ធនាគារចាប់តាំងពីពេលនោះរហូតមក ។

អ្នកស្រី Nafe និយាយថា អ្នកស្រីមិនស្គាល់មុខប្តីរបស់គាត់ថាទៅជាបែបណានោះទេ ពីព្រោះថាអ្នកស្រីត្រូវបានហាមឃាត់មិនឲ្យជួបប្តី អស់រយៈពេល ២ឆ្នាំចុងក្រោយនេះ ។

អ្នកស្រីនិយាយថា អ្នកស្រីតែងតែមានសុទិដ្ឋនិយម ហើយអ្នកស្រីតែងតែសង្ឃឹមថា ប្តី Nael នឹងមកនៅរួមរស់ជាមួយពួកយើងក្នុងពេលដ៏ខ្លីខាងមុខនេះ ។ អ្នកស្រីបានរៀបចំផ្ទះសម្បែង ទិញសម្លៀកបំពាក់មួយចំនួនសម្រាប់ប្តី ។ វាមានរយៈពេល ១០ឆ្នាំកន្លះហើយ សម្លៀកបំពាក់របស់ប្តីគាត់ប្រហែលជារហែកអស់ហើយ ។

អ៊ីស្រាអែល និយាយថា ជនប៉ាឡេស្ទីនដែលត្រូវបានកាត់ទោសសម្រាប់ការសម្លាប់អ៊ីស្រាអែល ត្រូវតែនិរទេសជារៀងរហូត បើសិនជាពួកគេត្រូវបានដោះលែងក្រោមកិច្ចព្រមព្រៀងបទឈប់បាញ់ហ្កាហ្សា ហើយពួកគេមិនត្រូវអនុញ្ញាតឲ្យវិលត្រឡប់មកផ្ទះនៅតំបន់វ៉េសប៊ែងវិញបាននោះទេ ៕