រថយន្តជំនួយសរុបជាង ២.៤០០គ្រឿង បានចូលទៅក្នុងតំបន់ហ្កាហ្សា ក្នុងរយៈពេលបីថ្ងៃនៃបទឈប់បាញ់រវាងអ៊ីស្រាអែល និងក្រុមហាម៉ាស ដោយរថយន្តជំនួយចំនួន ៦៣០ គ្រឿងបានចូលកាលពីថ្ងៃអាទិត្យ រថយន្ត ៩១៥គ្រឿងបានចូលនៅថ្ងៃចន្ទ និង ៨៩៧គ្រឿងបានចូលទៅនៅថ្ងៃអង្គារ (២១ មករា) ខណៈមន្រ្តីជាន់ខ្ពស់របស់អង្គការសហប្រជាជាតិ បាននិយាយថា រហូតមកទល់ពេលនេះ ពុំមានបញ្ហាសណ្ដាប់ធ្នាប់ ឬការលួចធំដុំនោះទេ។

ពេញមួយសង្រ្គាមរយៈពេល ១៥ខែ អង្គការសហប្រជាជាតិបានពណ៌នាប្រតិបត្តិការមនុស្សធម៌របស់ខ្លួនថាជាបែប "ឆក់ឱកាស" ដោយសារតែប្រឈមមុខនឹងបញ្ហាជាមួយប្រតិបត្តិការយោធារបស់អ៊ីស្រាអែល ការរឹតបន្តឹងការចូលទៅក្នុង និងទូទាំងតំបន់ហ្កាហ្សា រួមទាំងការលួចប្លន់ដោយក្រុមប្រដាប់អាវុធនាពេលថ្មីៗនេះ។

លោក Muhannad Hadi មន្ត្រីជំនួយជាន់ខ្ពស់របស់អង្គការសហប្រជាជាតិសម្រាប់តំបន់ហ្កាហ្សា និងវេសបែង បាននិយាយថា មានឧប្បត្តិហេតុតិចតួចនៃចោរកម្មក្នុងរយៈពេលបីថ្ងៃកន្លងមកនេះ ប៉ុន្តែ "មិនធំដុំដូចពីមុនទេ"។

កិច្ចព្រមព្រៀងបទឈប់បាញ់នេះ តម្រូវឱ្យរថយន្តដឹកជំនួយយ៉ាងហោចណាស់ ៦០០គ្រឿងត្រូវបានអនុញ្ញាតចូលទៅក្នុងហ្កាហ្សាជារៀងរាល់ថ្ងៃនៃបទឈប់បាញ់រយៈពេល ៦សប្តាហ៍ដំបូង រួមទាំងរថយន្តដឹកប្រេងចំនួន ៥០គ្រឿង។ ពាក់កណ្តាលនៃរថយន្តដឹកទំនិញទាំងនោះ ត្រូវបានគេសន្មត់ថាទៅកាន់ភាគខាងជើងហ្កាហ្សា ជាទីដែលអ្នកជំនាញព្រមានថា គ្រោះទុរ្ភិក្សជិតមកដល់៕