មេបញ្ជាការកងទ័ពអ៊ីស្រាអែល លោក Herzi Halevi បាននិយាយកាលពីថ្ងៃអង្គារ ទី២១ ខែមករា ថា លោកនឹងលាលែងពីតំណែងនៅថ្ងៃទី៦ ខែមីនា ដោយការទទួលខុសត្រូវចំពោះការបរាជ័យសន្តិសុខដ៏ធំ កាលពីថ្ងៃទី៧ ខែតុលា ឆ្នាំ២០២៣ នៅពេលដែលខ្មាន់កាំភ្លើងក្រុមហាម៉ាសប៉ាឡេស្ទីន មកពីតំបន់ហ្កាហ្សា បានធ្វើការវាយប្រហារឆ្លងព្រំដែនទៅលើប្រទេសអ៊ីស្រាអែល។

លោក Halevi ដែលត្រូវបានគេរំពឹងទុកយ៉ាងទូលំទូលាយថានឹងលាចេញពីតំណែងបន្ទាប់ពីមានមនុស្សស្លាប់ច្រើនបំផុតនៅថ្ងៃតែមួយក្នុងប្រវត្តិសាស្ត្ររបស់អ៊ីស្រាអែល បាននិយាយថា លោកនឹងបញ្ចប់ការស៊ើបអង្កេតរបស់កងកម្លាំងការពារអ៊ីស្រាអែលកាលពីថ្ងៃទី៧ ខែតុលា និងពង្រឹងការត្រៀមទប់ទល់របស់កម្លាំងការពារអ៊ីស្រាអែល សម្រាប់បញ្ហាប្រឈមនានាផ្នែកសន្តិសុខ។ ភ្លាមៗនេះ វាពុំច្បាស់នោះទេថា តើនរណានឹងចូលជំនួសតំណែង លោក Halevi ។

ទោះបីជាមានកំហឹងជាសាធារណៈកាលពីថ្ងៃទី៧ ខែតុលាក៏ដោយ ក៏រដ្ឋាភិបាលរបស់នាយករដ្ឋមន្ត្រី លោក Benjamin Netanyahu បានទប់ទល់ទៅនឹងការអំពាវនាវឱ្យបើកការស៊ើបអង្កេតរដ្ឋ សម្រាប់ការទទួលខុសត្រូវរបស់ខ្លួនផ្ទាល់ចំពោះការបរាជ័យសន្តិសុខដែលបានបណ្តាលឱ្យពលរដ្ឋអ៊ីស្រាអែល១.២០០នាក់ស្លាប់ និងមនុស្សប្រហែល២៥០នាក់ ត្រូវបានចាប់ជាចំណាប់ខ្មាំង។

លោក Halevi បានសរសេរនៅក្នុងលិខិតលាលែងពីតំណែងទៅកាន់រដ្ឋមន្ត្រីក្រសួងការពារជាតិអ៊ីស្រាអែល លោក Katz ថា «នៅព្រឹកថ្ងៃទី ៧ ខែតុលា កងកម្លាំងការពារអ៊ីស្រាអែល(IDF) បានបរាជ័យក្នុងបេសកកម្មរបស់ខ្លួន ដើម្បីការពារពលរដ្ឋអ៊ីស្រាអែល»។

មន្ត្រីយោធាជាន់ខ្ពស់មួយចំនួន បានលាលែងពីតំណែងរួចហើយ ជុំវិញការបរាជ័យកាលពីថ្ងៃទី៧ ខែតុលា ហើយមេបញ្ជាការនៃទីបញ្ជាការដ្ឋានភាគខាងត្បូងរបស់យោធា លោកឧត្តមសេនីយ៍ Yaron Finkelman ក៏បានប្រកាសថា លោកនឹងលាលែងពីតំណែង ផងដែរ។