ប្រធានាធិបតីសហរដ្ឋអាមេរិក លោក Donald Trump បានសន្យា កាលពីថ្ងៃអង្គារ ទី២១ ខែមករា ថានឹងដាក់ពន្ធលើសហភាពអឺរ៉ុប និងបានបញ្ជាក់ថាពន្ធ១០ភាគរយនឹងដាក់លើការនាំចូលរបស់ប្រទេសចិន ដែលអាចនឹងធ្វើឡើងក្នុងពេលឆាប់ៗនេះ នៅត្រឹមថ្ងៃទី១ ខែកុម្ភៈ។

លោក Trump ដែលបាននិយាយទៅកាន់អ្នកសារព័ត៌មាននៅសេតវិមាន មួយថ្ងៃបន្ទាប់ពីការស្បថចូលកាន់តំណែង បានលើកឡើងពីតម្រូវការដើម្បីកែតម្រូវអតុល្យភាពពាណិជ្ជកម្មរបស់សហភាពអឺរ៉ុបជាមួយសហរដ្ឋអាមេរិក ខណៈមានគោលបំណងម្តងទៀតលើទីក្រុងប៉េកាំង ជុំវិញការជួញដូរសារធាតុញៀនហ្វង់តានីល(fentanyl) ។

លោក Trump បាននិយាយអំពីសហភាពអឺរ៉ុបថា «ពួកគេប្រព្រឹត្តមកលើយើងយ៉ាងធ្ងន់ធ្ងរ។ ដូច្នេះពួកគេនឹងត្រូវដាក់ពន្ធ» «អ្នកពុំអាចទទួលបានយុត្តិធម៌ទេ បើអ្នកមិនធ្វើដូច្នេះ»។

លោក Trump បានបញ្ជាក់ទៅកាន់ប្លុកនេះ ដោយនិយាយថា ប្លុកអឺរ៉ុប មិនបាននាំចូលផលិតផលអាមេរិកគ្រប់គ្រាន់ទេ ហើយលោកនឹង «បំបាត់បញ្ហាទាំងនេះចេញ» ដោយការដាក់ពន្ធ ឬដោយការជំរុញឱ្យមានការទិញប្រេង និងឧស្ម័នបន្ថែមទៀត។

លោក Trump បាននិយាយឡើងវិញនូវការគំរាមរបស់លោកកាលពីថ្ងៃអង្គារ ក្នុងការដាក់ពន្ធ១០ ភាគរយលើប្រទេសចិន ដោយនិយាយថា វា «ផ្អែកលើការពិត ដែលថាពួកគេកំពុងបញ្ជូនសារធាតុហ្វង់តានីល ទៅកាន់ប្រទេសម៉ិកស៊ិក និងប្រទេសកាណាដា» ។

នៅពេលត្រូវបានសួរ ថាតើពន្ធទាំងនេះអាចត្រូវបានអនុម័តក្នុងពេលឆាប់ៗនេះទេ នោះលោកបាននិយាយថា «ប្រហែលជា នៅថ្ងៃទី១ ខែកុម្ភៈគឺជាកាលបរិច្ឆេទដែលយើងកំពុងសម្លឹងមើល»។

នេះគឺជាកាលបរិច្ឆេទដូចគ្នា ដែលលោកបាននិយាយថា លោកអាចដាក់ពន្ធ២៥ភាគរយ លើប្រទេសកាណាដា និងម៉ិកស៊ិក ដោយចោទប្រកាន់ប្រទេសទាំងពីរ ពីការខកខានមិនបានបញ្ឈប់ការធ្វើអន្តោប្រវេសន៍ខុសច្បាប់ និងការជួញដូរសារធាតុញៀនហ្វង់តានីល ចូលទៅក្នុងសហរដ្ឋអាមេរិក។