ក្រសួងដឹកជញ្ជូនរបស់ប្រទេសកូរ៉េខាងត្បូង បាននិយាយនៅថ្ងៃពុធ (២២ មករា) នេះថា ខ្លួននឹងរុះរើជញ្ជាំងទំនប់បេតុងដែលបានដំឡើងនៅអាកាសយានដ្ឋានអន្តរជាតិ Muan បន្ទាប់ពីការធ្លាក់យន្តហោះ Jeju Air កាលពីខែមុន ដែលជាគ្រោះមហន្តរាយផ្លូវអាកាសក្នុងស្រុកដ៏កាចសាហាវបំផុតរបស់ខ្លួន។

ខណៈក្រុមស៊ើបអង្កេតនៅតែបន្តរកមូលហេតុដែលបណ្តាលឱ្យជើងហោះហើរ Jeju Air ជួបគ្រោះថ្នាក់ រួមទាំងការបុកហ្វូងបក្សីដែលបានរាយការណ៍ ក្រុមអ្នកជំនាញបានបន្ទោសថា ជញ្ជាំងដ៏ធំដែលគាំទ្រអង់តែនចុះចតនៅចុងបញ្ចប់នៃផ្លូវរត់ ទំនងជាធ្វើឱ្យគ្រោះមហន្តរាយនេះធ្ងន់ធ្ងរជាងអ្វីដែលគួរតែកើតឡើង។

អាជ្ញាធរនិយាយថា ពួកគេនឹងបង្កើតគ្រឹះថ្មី ឬធ្វើការកែសម្រួលផ្សេងទៀតសម្រាប់អង់តែនបែបនេះនៅអាកាសយានដ្ឋានចំនួន៧ រួមទាំងអាកាសយានដ្ឋានអន្តរជាតិ Muan និង Jeju ឱ្យស្ថិតនៅក្រោមដី ឬងាយស្រួលក្នុងការបំបែកនៅពេលត្រូវបុក។

គួររម្លឹកថា សោកនាដកម្មកាលពីថ្ងៃទី២៩ ខែធ្នូ បានសម្លាប់មនុស្ស ១៧៩នាក់ ដោយបុគ្គលិកតែ ២នាក់ប៉ុណ្ណោះបានរួចរស់ជីវិត បន្តាប់ពីយន្តហោះ Boeing 737-800 បានធ្លាក់ក្នុងអំឡុងការចុះចត ដោយធ្លាក់ចេញពីផ្លូវរត់ រួចក៏បុកជញ្ជាំងបណ្ដាលឱ្យផ្ទុះឆេះ៕