រុស្ស៊ី បានអះអាងថាបានវាយប្រហារលើគោលដៅយោធាអ៊ុយក្រែន រួមទាំងរោងចក្រថាមពល និងហេដ្ឋារចនាសម្ព័ន្ធអាកាសយានដ្ឋានយោធា ខណៈអ៊ុយក្រែនបានបញ្ជាក់ថា ខ្លួនបានវាយប្រហារលើគោលដៅលើទឹកដីរុស្ស៊ី រួមមានឃ្លាំងស្តុកប្រេង និងរោងចក្រផលិតយន្តហោះ។

ក្រសួងការពារជាតិរុស្ស៊ី បាននិយាយនៅក្នុងរបាយការណ៍សមរភូមិកាលពីថ្ងៃអង្គារថា កងកម្លាំងរបស់ខ្លួនបានដណ្តើមយកទីតាំងទីលំនៅមួយកន្លែង និងបានវាយលុកលើគោលដៅនៅអ៊ុយក្រែន ដូចជារោងចក្រថាមពលនៃសហគ្រាសឧស្សាហកម្មយោធា ហេដ្ឋារចនាសម្ព័ន្ធអាកាសយានដ្ឋានយោធា និងរោងចក្រដំឡើងនិងស្តុកយានដ្រូន។

កងទ័ពអ៊ុយក្រែន និយាយថាបានវាយប្រហារលើឃ្លាំងស្តុកប្រេងមួយកន្លែងនៅតំបន់ Voronezh របស់រុស្ស៊ីនិងហេដ្ឋារចនាសម្ព័ន្ធ ដូចជារោងចក្រផលិតយន្តហោះនៅក្នុងតំបន់ Smolensk។ បន្ថែមលើនេះ កងទ័ពអ៊ុយក្រែន បានវាយរុញច្រានការវាយលុកជាច្រើនលើករបស់រុស្ស៊ីនៅទីក្រុង Kharkiv, Pokrovsk និងគោលដៅផ្សេងទៀត។

កាលពីថ្ងៃច័ន្ទ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយថា ប្រទេសរបស់លោក បើកចំហសម្រាប់ការសន្ទនាជាមួយរដ្ឋបាលថ្មីរបស់សហរដ្ឋអាមេរិក ជុំវិញវិបត្តិអ៊ុយក្រែន។

លោកពូទីន និយាយថា «អ្វីដែលសំខាន់បំផុតគឺការលុបបំបាត់មូលហេតុឫសគល់នៃវិបត្តិ»។ ក្នុងអំឡុងពេលកិច្ចប្រជុំជាមួយសមាជិកក្រុមប្រឹក្សាសន្តិសុខរបស់ប្រទេស លោកពូទីន បានរំលឹកឡើងវិញថា ដំណោះស្រាយដ៏មានសក្តានុពលនៃវិបត្តិអ៊ុយក្រែន មិនគួរពាក់ព័ន្ធនឹងបទឈប់បាញ់បណ្តោះអាសន្នដើម្បីប្រមូលផ្តុំកងកម្លាំងឡើងវិញសម្រាប់ជម្លោះបន្ថែមទៀតនោះទេ ប៉ុន្តែគឺ«សន្តិភាពយូរអង្វែង» ដោយផ្អែកលើការគោរពផលប្រយោជន៍ស្របច្បាប់របស់ប្រទេសទាំងអស់ នៅក្នុងតំបន់។