រដ្ឋមន្ត្រីក្រសួងមហាផ្ទៃប្រទេសម៉ាឡេស៊ី លោក Saifuddin Nasution Ismail បាននិយាយ កាលពីថ្ងៃអង្គារថា កិច្ចសហប្រតិបត្តិការឆ្លងព្រំដែនក្នុងចំណោមសមាជិកនៃសមាគមប្រជាជាតិអាស៊ីអាគ្នេយ៍ (អាស៊ាន) មានសារៈសំខាន់ក្នុងការរក្សាសន្តិភាព និងសន្តិសុខ ក្នុងតំបន់។

លោក Saifuddin បាននិយាយនៅក្នុងសុន្ទរកថានៅក្នុងកិច្ចប្រជុំកំពូលសន្តិសុខអន្តរជាតិអាស៊ី និងពិព័រណ៍ឆ្នាំ២០២៥ (AISSE 2025) ថា វាមានសារៈសំខាន់ជាពិសេសសម្រាប់អាស៊ាន ក្នុងការជម្នះលើបញ្ហាប្រឈមនានាផ្នែកសន្តិសុខដែលមានស្រាប់ និងកំពុងកើតមាន រួមទាំងការគំរាមកំហែងឧក្រិដ្ឋកម្មឆ្លងដែន។

«សម្រាប់ដៃគូអាស៊ាន តួនាទីនៃកិច្ចសហប្រតិបត្តិការ និងការកសាងទំនុកចិត្ត ត្រូវតែឈានដល់ក្នុងកម្រិតបន្ទាប់ អាស៊ានគួរតែរក្សាភាពស្អិតរមួត ឆ្លើយតប និងចូលរួមក្នុងការដោះស្រាយបញ្ហាប្រឈមចំពោះសន្តិភាព និងសន្តិសុខក្នុងតំបន់»។

លោកក៏បានសង្កត់ធ្ងន់ថា អាស៊ាន ត្រូវតែធ្វើការរួមគ្នាដើម្បីធ្វើឱ្យតំបន់នេះមានសុវត្ថិភាព សេរីភាព និងឯករាជ្យ ពីការគម្រាមកំហែងសន្តិសុខគ្រប់រូបភាព រួមទាំងភាពជ្រុលនិយម និងអំពើភេរវកម្ម។

ដោយត្រូវបានរៀបចំឡើងដោយក្រសួងមហាផ្ទៃប្រទេសម៉ាឡេស៊ី និងនគរបាលភូមិន្ទម៉ាឡេស៊ី កិច្ចប្រជុំកំពូលសន្តិសុខអន្តរជាតិអាស៊ី និងពិព័រណ៍ឆ្នាំ២០២៥ មានគោលបំណងជំរុញកិច្ចសហប្រតិបត្តិការអន្តរជាតិ ផ្សារភ្ជាប់ព្រំដែនសម្រាប់ពិភពលោកដែលកាន់តែមានសុវត្ថិភាព តាមរយៈការស៊ើបការណ៍រួម គំនិតផ្តួចផ្តើមបណ្តុះបណ្តាលរួម និងយុទ្ធសាស្ត្រ ដើម្បីដោះស្រាយបញ្ហាប្រឈមសន្តិសុខឆ្លងដែន។