នាយករដ្ឋមន្ត្រីប្រទេសកាណាដា លោក Justin Trudeau បាននិយាយជាថ្មីថា ការផ្តោតសំខាន់របស់ប្រទេសលោក គឺលើការទប់ស្កាត់ការដាក់ពន្ធដោយរដ្ឋាភិបាលសហរដ្ឋអាមេរិក ក្រោមការដឹកនាំរបស់ប្រធានាធិបតីថ្មី លោក Donald Trump ។

លោក Trump បាននិយាយថា លោកកំពុងពិចារណា ដាក់ពន្ធ២៥ភាគរយលើការនាំចូលពីប្រទេសកាណាដា និងប្រទេសម៉ិកស៊ិក ចាប់ពីថ្ងៃទី១ ខែកុម្ភៈ។

ដោយពណ៌នាលោក Trump ថាជា «អ្នកចរចាដ៏ជំនាញ» លោក Trudeau បាននិយាយ កាលពីថ្ងៃអង្គារថា ប្រធានាធិបតីសហរដ្ឋអាមេរិករូបនេះ «នឹងធ្វើអ្វី ដែលលោកអាចធ្វើបាន ដើម្បីធ្វើឲ្យដៃគូចរចារបស់លោកកុំឲ្យមានតុល្យភាពឃ្លាតគ្នាឆ្ងាយ»។

លោកបានលើកឡើងថា លោក Trump បង្ហាញពីបំណងចង់ឈានដល់យុគសម័យមាសសម្រាប់សហរដ្ឋអាមេរិក។ នាយករដ្ឋមន្ត្រីកាណាដា បាននិយាយថា ប្រសិនបើសេដ្ឋកិច្ចសហរដ្ឋអាមេរិក មើលឃើញការរីកចម្រើនបែបនោះ ប្រទេសនេះនឹងត្រូវការថាមពលកាន់តែច្រើន ដែកថែបកាន់តែច្រើន អាលុយមីញ៉ូមកាន់តែច្រើន និងសារធាតុរ៉ែសំខាន់ៗ កាន់តែច្រើនថែមទៀត។

លោកបញ្ជាក់ថា ប្រទេសកាណាដា មានធនធានទាំងអស់នេះ ហើយត្រៀមរួចរាល់ដើម្បីធ្វើការជាមួយសហរដ្ឋអាមេរិក។

ដោយនិយាយអំពីលទ្ធភាព ដែលលោក Trump បន្តការដាក់ពន្ធលើប្រទេសកាណាដា លោក Trudeau និយាយថា «ប្រសិនបើមានការដាក់ពន្ធ យើងត្រៀមខ្លួនរួចរាល់ ដើម្បីឆ្លើយតប និងការពារផលប្រយោជន៍របស់កាណាដា» ដោយធ្វើការរួមគ្នាជាមួយមេដឹកនាំអាជីវកម្ម មេដឹកនាំខេត្ត និងអ្នកដទៃទៀត។ ប្រទេសកាណាដា «បានត្រៀមខ្លួនសម្រាប់សេណារីយ៉ូ ដែលអាចកើតមាន»។