មន្ត្រីអង្គការសហប្រជាជាតិម្នាក់ បាននិយាយកាលពីថ្ងៃអង្គារថា ប្រតិបត្តិការនៅកំពង់ផែសមុទ្រក្រហម ក្នុងប្រទេសយេម៉ែន ដែលប្រើប្រាស់សម្រាប់ការនាំចូលជំនួយ បានធ្លាក់ចុះមកនៅត្រឹមប្រហែលមួយភាគបួននៃសមត្ថភាពរបស់ខ្លួន ដោយបន្ថែមថា ពុំមិនប្រាកដទេថា បទឈប់បាញ់នៅតំបន់ហ្កាហ្សា នឹងបញ្ចប់ការវាយប្រហាររវាងក្រុមហ៊ួទីដែលគាំទ្រដោយអ៊ីរ៉ង់ និងអ៊ីស្រាអែលដែរឬយ៉ាងណា។

ក្រុមហ៊ួទី បានបើកការវាយប្រហារលើការដឹកជញ្ជូនអន្តរជាតិ នៅជិតប្រទេសយេម៉ែន ចាប់តាំងពីខែវិច្ឆិកាឆ្នាំ ២០២៣ ក្នុងសាមគ្គីភាពជាមួយប៉ាឡេស្ទីន ក្នុងសង្គ្រាមរវាងអ៊ីស្រាអែល និងក្រុមហាម៉ាស នៅតំបន់ហ្កាហ្សាស្ទ្រីប។ ទង្វើរបស់ក្រុមនេះ បានជំរុញឲ្យអ៊ីស្រាអែលវាយប្រហារកំពង់ផែ និងរោងចក្រថាមពល រួមទាំងកំពង់ផែសមុទ្រក្រហម Hodeidah ផងដែរ។

លោក Julien Harneis អ្នកសម្របសម្រួលក្នុងតំបន់និងមនុស្សធម៌របស់UN នៅយេម៉ែន បានប្រាប់កិច្ចប្រជុំអង្គការសហប្រជាជាតិ នៅទីក្រុងហ្សឺណែវ កាលពីថ្ងៃអង្គារថា៖«ផលប៉ះពាល់នៃការវាយប្រហារតាមអាកាស លើកំពង់ផែ Hodeidah ជាពិសេស នៅក្នុងប៉ុន្មានសប្តាហ៍ចុងក្រោយនេះ គឺធ្ងន់ធ្ងរខ្លាំងណាស់»។

លោកបាននិយាយថា នាវាសណ្តោងចំនួន ៤គ្រឿង ក្នុងចំណោមនាវាទាំង ៥គ្រឿង របស់កំពង់ផែដែលចាំបាច់សម្រាប់អមដំណើរនាវាធំៗ ដែលដឹកទំនិញចូលមក បានលិច ខណៈដែលនាវាទី ៥ ត្រូវបានខូចខាត ដោយមិនមានការស្តីបន្ទោសទៅលើភាគីណាមួយឡើយ។