ក្រសួងយុត្តិធម៌ របាយការណ៍ព័ត៌មានអ៊ីតាលី និងមន្ត្រីលីប៊ី បាននិយាយកាលពីថ្ងៃអង្គារថា នគរបាលអ៊ីតាលី បានចាប់ខ្លួនមេទ័ពលីប៊ីម្នាក់ តាមដីការបស់តុលាការឧក្រិដ្ឋកម្មអន្តរជាតិ (ICJ)។ 

លោក Ossama Anjiem ដែលត្រូវបានគេស្គាល់ថា Ossama al-Masri ជាប្រធានសាខានៃស្ថាប័នកំណែទម្រង់និងស្តារនីតិសម្បទា នៅទីក្រុងទីប៉ូលី ជាបណ្តាញទុច្ចរិតនៃមជ្ឈមណ្ឌលឃុំឃាំងគ្រប់គ្រងដោយកងកម្លាំងការពារពិសេស ដែលគាំទ្រដោយរដ្ឋាភិបាល។ កងកម្លាំងការពារពិសេស (SDF) ដើរតួជាអង្គភាពអាវុធហត្ថប្រយុទ្ធប្រឆាំងនឹងឧក្រិដ្ឋកម្មកម្រិតខ្ពស់ រួមទាំងការចាប់ជំរិត ឃាតកម្ម ក៏ដូចជាការធ្វើទេសន្តរប្រវេសន៍ខុសច្បាប់។

ដូចកងជីវពលជាច្រើនទៀត នៅភាគខាងលិចប្រទេសលីប៊ី កងកម្លាំងការពារពិសេស (SDF) បានជាប់ពាក់ព័ន្ធក្នុងអំពើឃោរឃៅ ក្នុងសង្គ្រាមស៊ីវិល ដែលបានកើតឡើង បន្ទាប់ពីការផ្តួលរំលំ និងការសម្លាប់មេដឹកនាំផ្តាច់ការលីប៊ី ដែលបានដឹកនាំដ៏យូរលោក Moammar Gadhafi ក្នុងឆ្នាំ ២០១១។ នាពេលថ្មីៗនេះ អគ្គរដ្ឋអាជ្ញារបស់តុលាការឧក្រិដ្ឋកម្មអន្តរជាតិ បានចេញដីកាចាប់ខ្លួនជុំវិញឧក្រិដ្ឋកម្ម ដែលត្រូវបានចោទប្រកាន់        នៅក្នុងប្រទេសលីប៊ី លើសពីសង្គ្រាមស៊ីវិល រួមទាំងមន្ទីរឃុំឃាំងដែលក្រុមសិទ្ធិមនុស្ស បានចងក្រងឯកសារអំពីការរំលោភបំពាននានា។

សារព័ត៌មានអ៊ីតាលី Avvenire និង La Stampa បានរាយការណ៍ថា លោក al-Masri ត្រូវបានចាប់ខ្លួននៅទីក្រុង Turin កាលពីថ្ងៃអាទិត្យ តាមដីកាពីតុលាការ ដែលមានមូលដ្ឋាននៅទីក្រុងឡាអេ ប្រទេស    ហូឡង់ បន្ទាប់ពីលោកបានចូលរួមការប្រកួតបាល់ទាត់ Juventus-Milan កាលពីយប់ថ្ងៃសៅរ៍។ មេធាវីរបស់លោក al-Masri គឺលោក Daniele Folino បានបញ្ជាក់ពីការចាប់ខ្លួន ប៉ុន្តែបាននិយាយថា ខ្លួនមិនអាចផ្តល់ព័ត៌មានលម្អិតបានទេ ដោយសារខ្លួនមិនទាន់ត្រូវបានតែងតាំងជាផ្លូវការ នៅឡើយ។