មន្ត្រីកោះស៊ីប បាននិយាយកាលពីថ្ងៃអង្គារ បន្ទាប់ពីការប្រកាសពីទីក្រុងវ៉ាស៊ីនតោនអំពីកិច្ចសហប្រតិបត្តិការជាមួយកោះមេឌីទែរ៉ាណេថា ក្រុមវាយតម្លៃយោធាមកពីសហរដ្ឋអាមេរិក នឹងស្ថិតនៅក្នុងប្រទេសកោះស៊ីប ក្នុងសប្តាហ៍នេះ ដែលជាផ្នែកមួយនៃការធ្វើឲ្យប្រសើរឡើងផ្នែកការពារជាតិ។  

អ្នកនាំពាក្យរដ្ឋាភិបាលកោះស៊ីប លោក Konstantinos Letymbiotis បាននិយាយថា ក្រុមវាយតម្លៃដែលមានមូលដ្ឋាន នៅប្រទេសអាល្លឺម៉ង់ នឹងផ្តល់ចំណេះដឹង និងអនុសាសន៍លើគម្រោងហេដ្ឋារចនាសម្ព័ន្ធ ដើម្បីបង្កើនអន្តរប្រតិបត្តិការជាមួយសហរដ្ឋអាមេរិក និងដៃគូដទៃទៀត។

លោក Letymbiotis បានប្រាប់សន្និសីទសារព័ត៌មានមួយថា៖«ការធ្វើឲ្យប្រសើរឡើងនូវហេដ្ឋារចនាសម្ព័ន្ធ ការផ្គត់ផ្គង់មធ្យោបាយទំនើប និងការវិនិយោគក្នុងការបណ្តុះបណ្តាល គឺជាសសរស្តម្ភសំខាន់នៃយុទ្ធសាស្ត្រជាតិរបស់យើងសម្រាប់ការការពារប្រកបដោយប្រសិទ្ធភាព និងមានភាពបត់បែនប»។

ការវាយតម្លៃនេះ នឹងធ្វើឡើងនៅមូលដ្ឋានយោធាមួយ នៅស្រុក Paphos ភាគខាងលិច។

ជាយុទ្ធសាស្ត្រ ដោយសារស្ថានភាពមជ្ឈិមបូព៌ាដែលងាយនឹងបង្កហេតុនោះ កោះស៊ីបដែលជាសមាជិកសហភាពអឺរ៉ុប បានដើរតួនាទីសំខាន់មួយ ក្នុងការជម្លៀសជនស៊ីវិលចេញពីតំបន់នេះ ក្នុងអំឡុងពេលមានភាពតានតឹងជាច្រើន បានកើតឡើងនោះ។

កាលពីឆ្នាំមុន ប្រទេសនេះ បានបង្កើតច្រករបៀងជំនួយមនុស្សធម៌ ទៅកាន់តំបន់ហ្កាហ្សា ជាកន្លែងដែលកិច្ចព្រមព្រៀងបទឈប់បាញ់ បានចូលជាធរមាន កាលពីថ្ងៃអាទិត្យ។