ឧត្តរមានជ័យ៖ ដើម្បីជួយសង្គ្រោះជីវិតមនុស្សប្រកបដោយមនុស្សធម៌ ក្នុងករណីកើត​មាន​គ្រោះថ្នាក់ផ្សេងៗ​កើតឡើង ដែលត្រូវការឈាមជាចាំបាច់ឯកឧត្ដម មាន ចាន់យ៉ាដា អភិបាលខេត្ត និងជាប្រធានសហភាពសហព័ន្ធយុវជនកម្ពុជា ខេត្តឧត្ដរមានជ័យ បានដឹកនាំសមាជិក-សមាជិកាក្រុមគ្រួសារ ស.ស.យ.ក. ខេត្តជាង១០០នាក់ បរិច្ចាគឈាម ដើម្បីជួយសង្គ្រោះជីវិត និងចែកអំណោយរបស់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដល់អ្នកជំងឺក្រីក្រ នៅក្នុងមន្ទីរពេទ្យបង្អែកខេត្ត នាព្រឹកថ្ងៃទី២២ ខែមករាឆ្នាំ២០២៥នេះ។

ក្នុងពិធីនោះដែរ ឯកឧត្ដម មាន ចាន់យ៉ាដា បានលើកឡើងថា សកម្មភាពបរិច្ចាគឈាម នឹង​បង្កើត​បាននូវទម្លាប់ ​និងវប្បធម៌នៃការបរិច្ចាគឈាមដោយស្ម័គ្រចិត្ត ​និងជំរុញការលើក​កម្ពស់​ប្រជាជន​ទូទៅចូលរួមធ្វើសកម្មភាព ​ជាមួយនឹងសេវាកម្មជាតិផ្តល់ឈាមនៅទូទាំងប្រទេស ដើម្បីធានា​ឱ្យបាននូវការផ្តល់ជូនឈាមគ្រប់គ្រាន់សម្រាប់អ្នកជំងឺដែលកំពុងត្រូវការឈាម និងគ្រប់មន្ទីរពេទ្យ​ទាំងអស់ដោយមិនមានការរើសអើងជាតិសាសន៍ សាសនា ឬនិន្នាការនយោបាយឡើយ។

ឯកឧត្ដម បន្តថា ការបរិច្ចាគឈាម ​មិនត្រឹមតែជួយសង្គ្រោះជីវិតមនុស្សនោះទេ តែបានផ្ដល់​អត្ថប្រយោជន៍​ដល់សុខភាព គឺជួយកាត់បន្ថយនូវហានិភ័យជំងឺមហារីកនានា កាត់បន្ថយ​កំហាប់ឈាម ​និងការលើសជាតិដែក ​ដែលធ្វើឱ្យមានការប៉ះពាល់ដល់ថ្លើម ​និងលំពែង, ជួយធ្វើឱ្យ​ប្រសើរឡើង​នូវសុខភាពបេះដូង, បន្ថយការឡើងទម្ងន់, និងជំងឺដាច់សរសៃឈាមក្នុងខួរក្បាល។

ឯកឧត្ដម ​ប្រធានសហភាពសហព័ន្ធយុវជនកម្ពុជាខេត្ត ​បានអំពាវនាវ ​ឱ្យមន្ត្រីរាជការ ក៏ដូចជា​ប្រជាពលរដ្ឋទាំងអស់ ដែលមានសុខភាពល្អ ចូលរួមបរិច្ចាគឈាមដោយស្ម័គ្រ ​ជូនមន្ទីរពេទ្យបង្អែក ឬមណ្ឌលសុខភាពដែលនៅក្នុងមូលដ្ឋានរបស់បងប្អូន ​ឱ្យបានកាន់តែច្រើនបន្ថែមទៀត សម្រាប់​ប្រើប្រាស់​ជួយសង្គ្រោះជីវិតអ្នកដែលត្រូវការឈាមបន្ទាន់ផងដែរ៕