នៅពេលដែលលោក Sebastian Harrison ធ្វើការប៉ាន់ប្រមាណពីតម្លៃខូចខាត ចំពោះលំនៅឋានរបស់លោកដែលត្រូវបានបំផ្លិចបំផ្លាញដោយចំហេះព្រៃ នៅទីក្រុង Los Angeles រូបលោកត្រូវប្រឈមមុខនឹងការពិតដ៏សែនអាក្រក់ ដោយសារការមិនមានធានារ៉ាប់រង។ 

លោក Harrison មិនខុសពីអ្នកស្រុករដ្ឋកាលីហ្វ័រញ៉ាជាច្រើននាក់ផ្សេងទៀត ត្រូវបានបង្ខំបោះបង់ធានារ៉ាប់រង ដោយសារតែបុព្វលាភឡើងខ្ពស់ដល់ ៤០.០០០ដុល្លារ ក្នុងមួយឆ្នាំ ដែលពួកគេមិនអាចលៃបង់បាន។ អតីតតារាសម្តែងវ័យ ៥៩ឆ្នាំរូបនេះ បាននិយាយថា៖ «អាហារសម្រាប់គ្រួសាររបស់ខ្ញុំ គឺសំខាន់ជាងអ្វីទាំងអស់»។ រូបលោក ឥឡូវនេះ បានប្រឈមនឹងការចំណាយប្រាក់លើកម្ចីទិញផ្ទះ ខណៈមិនមានសំណាញ់សុវត្ថិភាពហិរញ្ញវត្ថុ។

ចំហេះព្រៃអាក្រក់ទៅៗ នៅរដ្ឋកាលីហ្វ័រញ៉ា ដែលបង្កឡើងដោយការប្រែប្រួលអាកាសធាតុ បានធ្វើឲ្យសំណងធានារ៉ាប់រង កាន់តែពិបាកប៉ាន់ស្មាន។ ដោយប្រឈមមុខនឹងការទាមទារកើនឡើងកាន់តែខ្ពស់ ពោលគឺតម្លៃការខូចខាតកាន់តែធ្ងន់ធ្ងរ និងថ្លៃជួសជុលកាន់តែខ្ពស់ ដោយសារតែតម្លៃពលកម្ម និងសម្ភារៈឡើងថ្លៃ ក្រុមហ៊ុនធានារ៉ាប់រង បានចាកចេញពីរដ្ឋនេះក្នុងចំនួនដ៏ច្រើន ដោយទម្លាក់ចោលអតិថិជនដែលមានស្រាប់ និងបដិសេធមិនសរសេរគោលការណ៍ថ្មី។ សូម្បីតែក្រុមហ៊ុនមានឈ្មោះដ៏ធំ នៅក្នុងទីផ្សារ ដូចជា State Farm និង Allstate ក៏បានដកខ្លួនទៅវិញដែរ។

ដោយការរំពឹងទុកពីខាតបង់ដ៏ធំពីចំហេះព្រៃ Palisades និង Eaton ដែលនឹងផ្ដល់បញ្ហាប្រឈមដល់វិស័យធានារ៉ាប់រងបន្ថែមទៀតនោះ រដ្ឋកាលីហ្វ័រញ៉ាបានចេញសេចក្តីប្រកាសមួយដែលរារាំងក្រុមហ៊ុនកុំឲ្យទម្លាក់អតិថិជន ឬ បដិសេធមិនបន្តផ្ដល់ដល់ពួកគេ នៅក្នុងតំបន់ដែលរងផលប៉ះពាល់ជាក់លាក់ រយៈពេលមួយឆ្នាំ៕