អាជ្ញាធរអ៊ីស្រាអែលបាននិយាយថា អ្នកវាយប្រហារជាជនបរទេសម្នាក់ បានចាក់មនុស្ស ៥នាក់ នៅក្នុងទីក្រុង Tel Aviv កាលពីថ្ងៃអង្គារ (ទី២១ ខែមករា) មុនពេលជនដៃដល់រូបនោះត្រូវបានបាញ់សម្លាប់។

ហេតុការចាក់បណ្ដាលឲ្យរបួលនេះ បានកើតឡើងនៅកន្លែងកម្សាន្តពេលរាត្រីដ៏មមាញឹកមួយនៃរដ្ឋធានីពាណិជ្ជកម្មរបស់អ៊ីស្រាអែល ដែលអ្នកថតរូបរបស់សារព័ត៌មាន AFP ម្នាក់ បានឃើញថា មានការរារាំងពីនគរបាលមិនឲ្យចូលតំបន់នោះ។

នគរបាលបានប្រាប់ឲ្យដឹងថា៖ «ភេរវករម្នាក់ដែលមានកាំបិតក្នុងដៃ បានចាប់ផ្តើមចាក់មនុស្ស នៅលើផ្លូវ Nahalat Binyamin ដោយធ្វើឲ្យជនស៊ីវិល ៤នាក់រងរបួស មុនពេលចាក់ឲ្យរបួសម្នាក់ទៀត នៅក្បែរនោះ»។

នគរបាលបានបង្ហាញអត្តសញ្ញាណជនវាយប្រហារនោះថា ជាជនបរទេសអាយុ ២៨ឆ្នាំ ដែលត្រូវកងកម្លាំងសន្តិសុខបាញ់សម្លាប់។ អ្នកថតរូបរបស់សារព័មាន AFP បានឃើញសពបុរសម្នាក់នៅលើផ្លូវ។

មន្ទីរពេទ្យ Ichilov ក្នុងទីក្រុង Tel Aviv បានឲ្យដឹងថា ខ្លួនបានទទួលជនរងគ្រោះដែលត្រូវបានចាក់ចំនួន ៣នាក់ ក្នុងនោះមានម្នាក់ស្ថិតក្នុងស្ថានភាពធ្ងន់ធ្ងរ ដោយមានរបួសត្រង់ក ដែលត្រូវបាននាំទៅវះកាត់»។

រដ្ឋមន្ត្រីមហាផ្ទៃ លោក Moshe Arbel បាននិយាយថា អ្នកវាយប្រហារត្រូវបានសាកសួរ នៅពេលមកដល់អាកាសយានដ្ឋាន Ben Gurion របស់ទីក្រុង Tel Aviv ហើយត្រូវបានអនុញ្ញាតឲ្យចូលប្រទេស។ លោកបានជំរុញប្រធានទីភ្នាក់ងារសន្តិសុខផ្ទៃក្នុង Shin Bet លោក Ronen Bar ឲ្យ «ស៊ើបអង្កេតហេតុការណ៍នេះយ៉ាងម៉ត់ចត់ ហើយវាយតម្លៃឲ្យបានឆាប់តាមដែលអាចធ្វើទៅបាន»៕