ប្រធានក្រុមជំនួយមនុស្សធម៌សំខាន់ បាននិយាយថា បទបញ្ជារបស់ប្រធានាធិបតីសហរដ្ឋអាមេរិកលោក Donald Trump ឲ្យបញ្ឈប់ជំនួយបរទេសរយៈពេល ៩០ថ្ងៃ នឹងមានផលវិបាកបន្ទាន់ និងដ៏គ្រោះថ្នាក់នៅក្នុងប្រទេសអាហ្វហ្គានីស្ថាន ជាទីដែលប្រតិបត្តិការចែកចាយជំនួយ មានចំនួនតិចតួចរួចទៅហើយ ។

ស្របពេលឡើងកាន់តំណែងកាលពីថ្ងៃចន្ទ លោក Trump បានបញ្ជាឲ្យផ្អាកបណ្តោះអាសន្នជំនួយបរទេស ដោយរង់ចាំការវាយតម្លៃលើប្រសិទ្ធភាព និងភាពស៊ីសង្វាក់គ្នាជាមួយនឹងគោលនយោបាយការបរទេសរបស់លោកជាមុនសិន ។

លោក Jan Egeland គឺជាអគ្គលេខាធិការក្រុមប្រឹក្សាជនភៀសខ្លួនន័រវែស និយាយប្រាប់ទីភ្នាក់ងារព័ត៌មានរ៉យទ័រថា ការសម្រេចចិត្តនេះ បានធ្វើឲ្យទីភ្នាក់ងារជំនួយជាច្រើនជួបការលំបាក ខណៈពេលដែលពួកគេបានប្រឈមរួចទៅហើយការកាត់បន្ថយបន្ថែមទៀតពីម្ចាស់ជំនួយធំជាងគេបំផុតមួយនេះដល់ប្រទេសអាហ្វហ្គានីស្ថាន ។

លោកបាននិយាយអំឡុងបទសម្ភាសន៍តាមវីដេអូពីទីក្រុងកាប៊ុលកាលពីយប់ថ្ងៃអង្គារថា ការផ្អាកជំនួយទាំងអស់រយៈពេល ៩០ថ្ងៃ គ្មានការផ្តល់ជូនថ្មី គ្មានការផ្ទេរមូលនិធិថ្មី នឹងបង្កឲ្យមានផលវិបាកដ៏គ្រោះថ្នាក់បន្ទាន់តែម្តង សម្រាប់ប្រតិបត្តិការជំនួយអត់ឃ្លានដល់ក្មេងស្រីក្រីក្រ និងងាយរងគ្រោះ ស្រ្តី ហើយនិងជនស៊ីវិលនៅក្នុងប្រទេសអាហ្វហ្គានីស្ថាន ។

អាហ្វហ្គានីស្ថានដែលហែកហួរដោយសារភ្លើងសង្រ្គាម និងជាប្រទេសមានពលរដ្ឋរស់នៅ ២៣លាននាក់ ត្រូវការជំនួយមនុស្សធម៌ ប៉ុន្តែជំនួយបានធ្លាក់ចុះ ពេលដែលម្ចាស់ជំនួយប្រឈមនឹងវិបត្តិសកល និងវិបត្តិការទូត ធ្វើឲ្យកើតមានក្តីកង្វល់ពីការរឹតត្បិតរបស់ក្រុមតាលីបង់លើស្រ្តី ក្នុងវិស័យជាច្រើន រួមទាំងវិស័យអប់រំផងដែរ ៕