នាយករដ្ឋមន្ត្រីប៉ូឡូញ លោក Donald Tusk នៅថ្ងៃពុធ (ទី២២ ខែមករា) នេះ បាននិយាយថា អឺរ៉ុបគួរតែស្វាគមន៍ ជាជាងបដិសេធ ចំពោះអំពាវនាវរបស់ប្រធានាធិបតីអាមេរិក លោក Donald Trump ដែលចង់ឲ្យសមាជិកអង្គការណាតូផ្សេងទៀតបង្កើនការចំណាយផ្នែកយោធារបស់ពួកគេបន្ថែមទៀត ដោយសង្កត់ធ្ងន់ពីសារៈសំខាន់នៃសន្តិសុខ សម្រាប់ទ្វីបនេះ។

លោក Trump បាននិយាយថា សមាជិកនៃសម្ព័ន្ធភាពយោធាមួយនេះ គួរតែចំណាយ ៥ភាគរយនៃផលិតផលក្នុងស្រុកសរុប (GDP) របស់ពួកគេ លើវិស័យការពារជាតិ ដែលជាការដំឡើងខ្ពស់ខ្លាំងពីគោលដៅបច្ចុប្បន្ន ២ភាគរយ និងជាកម្រិតមួយដែលមិនមានប្រទេសសមាជិករបស់អង្គការណាតូមួយណា ក្នុងនោះរួមទាំងសហរដ្ឋអាមេរិកផងដែរ នាពេលនេះ សម្រេចបាន។

ការទាមទារនេះដែលត្រូវបានធ្វើឡើងម្តងទៀត កាលពីថ្ងៃចន្ទ (ទី២០ ខែមករា) នៅពេលរូបលោកចូលកាន់តំណែង គឺជាការរំលឹកពីការផ្តោតរបស់លោក ជុំវិញការចំណាយរបស់អង្គការណាតូ អំឡុងអាណត្តិដំបូង និងក៏ដូចជាប្រាប់ជាថ្មីនូវការគំរាមកំហែងរបស់លោក ក្នុងការមិនការពារសម្ព័ន្ធមិត្តដែលមិនបានចំណាយគ្រប់គ្រាន់។ មន្ត្រីមកពីអង្គការណាតូ មិនបានគាំទ្រគោលដៅ ៥ភាគរយនេះទេ។

តែយ៉ាងណាក្ដី លោក Tusk បានប្រាប់សមាជិកសភានៃសភាអ៊ឺរ៉ុបថា៖ «យើងមិនគួរខឹងសម្បានឹងការទាមទារនេះទេ។ យើងមិនគួរព្រួយបារម្ភនោះឡើយ។ អ្នកខ្លះគិតថា វាគឺការចំណាយហួសហេតុ ឬវាជាការព្រមានដ៏ឃោរឃៅ ឬគ្រោះថ្នាក់»។

លោក Tusk ដែលឥឡូវនេះប្រទេសរបស់លោកកាន់តំណែងជាប្រធានសហភាពអឺរ៉ុបប្ដូរវេនរយៈពេល ៦ខែ បាននិយាយថា «ពេលវេលានៃភាពស្រណុកសុខស្រួល» បានចប់ហើយ ខណៈដែលប្រធានាធិបតីថ្មីរបស់សហរដ្ឋអាមេរិក កំពុងនិយាយថា អឺរ៉ុបចាំបាច់ត្រូវមានចំណែកនៃការទទួលខុសត្រូវកាន់តែច្រើនឡើងៗ សម្រាប់សន្តិសុខរបស់ខ្លួន។