យោងតាមអង្គការសហប្រជាជាតិបានឱ្យដឹងថា មនុស្សជាងមួយលាននាក់បានភៀសខ្លួនចេញពីសង្រ្គាមនៅក្នុងប្រទេសស៊ូដង់ ដើម្បីស្វែងរកការជ្រកកោននៅក្នុងប្រទេសស៊ូដង់ខាងត្បូងដែលនៅជិតខាង។  

នៅក្នុងការធ្វើបច្ចុប្បន្នភាពចុងក្រោយរបស់ខ្លួនស្ដីពីវិបត្តិភៀសខ្លួនដ៏ធ្ងន់ធ្ងរបំផុតមួយរបស់ពិភពលោក អង្គការសហប្រជាជាតិបានចេញទិន្នន័យថ្មីកាលពីថ្ងៃអង្គារសប្ដាហ៍នេះ ដែលបង្ហាញថាមនុស្សជាង៧៧០.០០០ នាក់បានភៀសខ្លួនតាមរយៈច្រក Joda នៅតាមព្រំដែនភាគខាងជើងនៃប្រទេសស៊ូដង់ខាងត្បូងជាមួយប្រទេសស៊ូដង់ក្នុងរយៈពេល២១ ខែចុងក្រោយនេះ។

មនុស្សរាប់ម៉ឺននាក់ទៀតបានឆ្លងព្រំដែននៅចំណុចផ្សេងទៀត នាំឱ្យចំនួនសរុបដែលបានភៀសខ្លួនទៅកាន់ប្រទេសស៊ូដង់ខាងត្បូង ចាប់តាំងពីសង្គ្រាមរវាងកងកម្លាំងគាំទ្រប៉ារ៉ារហ័ស (RSF) និងកងកម្លាំងប្រដាប់អាវុធស៊ូដង់ (SAF) បានផ្ទុះឡើងកាលពីខែមេសា ឆ្នាំ២០២៣ កើនឡើងដល់ជាងមួយលាននាក់ នេះបើតាមសេចក្តីថ្លែងការណ៍ដែលចេញដោយឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) និងអង្គការទេសន្តរប្រវេសន៍អន្តរជាតិសម្រាប់ការធ្វើអន្តោប្រវេសន៍ (IOM)។

លោកស្រី Sanaa Abdalla Omer របស់អង្គការ UNHCR បាននិយាយថា ការមកដល់នៃមនុស្សជាងមួយលាននាក់ទៅកាន់ប្រទេសស៊ូដង់ខាងត្បូង គឺជាចំនួនស្ថិតិគួរឱ្យយកចិត្តទុកដាក់ ហើយពិតជាបង្ហាញពីការកើនឡើងនៃវិបត្តិមនុស្សធម៌ដ៏យ៉ាប់យ៉ឺននេះ៕