​បាល់ទាត់៖ ​ខ្សែប្រយុទ្ធ Arsenal ដែល​កំពុង​មាន​ទំរង់​លេង​ល្អ Emile Smith Rowe ត្រូវ​បាន​កោះហៅ​ចូល​ក្រុម​ជំរើសជាតិ​អង់គ្លេស​ជា​លើកដំបូង​សំរាប់​ការប្រកួត​ជំ​រុះ World Cup ទល់នឹង​អាល់​បា​នី និង​សាន់​ម៉ា​រី​ណូ​។ ​កីឡាករ​របស់ Manchester United ទាំងពីរ Marcus Rashford និង Luke Shaw ក៏ដូចជា Mason Mount និង James Ward-Prowse សុទ្ធតែ​មិន​អាច​ជួយ​ក្រុម​ជំរើស​ជាតិ​បាន​។​

​​កីឡាករ​របស់ Southampton, James Ward-Prowse កំពុង​មាន​ជំងឺ ស្រប​ពេល Rashford ក៏​កំពុង​សម្រាក​ថែទាំ​របួស​ស្មា​របស់​ខ្លួន​ឱ្យ​បានជា ១០០%​។​ ​ចំណែក​ឯ​ខ្សែបម្រើ Chelsea, Mason Mount ក៏​ដក​ខ្លួន​ដោយសារ​មាន​បញ្ហា​ធ្មេញ​ ខណៈ Luke Shaw ក៏​មាន​របួស​បន្តិចបន្តួច​ដែរ​ក្រោយ​ការប្រកួត​ទល់នឹង Manchester City កាលពី​ថ្ងៃ​សៅរ៍​។​ ​អវត្តមាន​កីឡាករ​ខាងលើ​ធ្វើ​ឱ្យ​លោក Gareth Southgate សំរេច​កោះហៅ​កីឡាករ​ជំរើសជាតិ​អង់គ្លេស​អាយុ​ក្រោម ២១​ឆ្នាំ Emile Smith Rowe ឡើង​មកលេង​ក្រុម​ធំ​ជា​លើកដំបូង​ បន្ទាប់ពី​កីឡាករ​វ័យ ២១​ឆ្នាំ​រូបនេះ​កំពុង​ទទួល​បាន​ការ​ចាប់​អារម្មណ៍​ខ្លាំង​នៅ Arsenal ពោល​គឺ​គេ​បាន​ស៊ុត​បញ្ចូល​ទី ៣​ប្រកួត​ចុងក្រោយ​ឱ្យ Arsenal​។​ ​​សូម​បញ្ជាក់​ថា ​អង់គ្លេស​នឹង​ត្រូវ​ជួប​ជាមួយ​ក្រុម​អាល់​បា​នី​នៅ Wembley ថ្ងៃ​សុក្រ​នេះ មុន​ធ្វើដំណើរ​ទៅ​ទឹកដី​សាន់​ម៉ា​រី​ណូ​នៅ​ថ្ងៃទី១៥ សប្ដាហ៍​ក្រោយ​។ ​អង់គ្លេស​ត្រូវការ​ ៤​ពិន្ទុ​ពី​ការប្រកួត ២​លើក​នេះ​ដើម្បី​ធានា​បាន​កៅអី​នៅ​ជុំ​ផ្ដាច់ព្រ័ត្រ World Cup ២០២២ ប្រទេស​កាតា​៕

​អត្ថបទ​៖​នាង សុភា​វុ​ធ