រដ្ឋបាលរបស់លោកប្រធានាធិបតី Donald Trump បានបញ្ជារដ្ឋអាជ្ញាអាមេរិក ឱ្យស៊ើបអង្កេតព្រហ្មទណ្ឌលើមន្ត្រីក្នុងតំបន់ដែលប្រឆាំងនឹងកិច្ចខិតខំប្រឹងប្រែងអនុវត្តច្បាប់អន្តោប្រវេសន៍ នៅក្នុងការព្រមានដ៏ខ្លាំងក្លាមួយ ខណៈបង្កើនការបង្រ្កាបដ៏ធំដែលលោក Trump ចាប់ផ្តើមធ្វើនៅថ្ងៃចូលកាន់តំណែង។

នៅក្នុងអនុស្សរណៈមើលឃើញដោយសារព័ត៌មានរ៉យទ័របង្ហាញថា អនុរដ្ឋមន្រ្តីស្តីទីនៃក្រសួងយុត្តិធម៌របស់លោក Trump គឺលោក Emil Bove បានប្រាប់បុគ្គលិកក្រសួងយុត្តិធម៌ថា អាជ្ញាធររដ្ឋ និងមូលដ្ឋាន ត្រូវតែសហការជាមួយនឹងការបង្ក្រាបជនអន្តោប្រវេសន៍ ហើយរដ្ឋអាជ្ញាសហព័ន្ធ "នឹងស៊ើបអង្កេតឧប្បត្តិហេតុពាក់ព័ន្ធនឹងការមិនធ្វើតាមបញ្ជា ដោយអាចមានការកាត់ទោសតាមច្បាប់"។

អនុស្សរណៈបន្ថែមថា ក្រសួងយុត្តិធម៌ក៏អាចនឹងតតាំងច្បាប់ដែលធ្វើអោយស្មុគស្មាញដល់កិច្ចខិតខំប្រឹងប្រែងនេះផងដែរ។

គោលនយោបាយនេះត្រូវបានដាក់ចេញនៅពេលរដ្ឋបាលបក្សសាធារណៈរដ្ឋថ្មីបានរៀបចំពង្រឹងការគ្រប់គ្រងអន្តោប្រវេសន៍ខុសច្បាប់នៅក្នុងទីក្រុងដែលមានចំនួនជនអន្តោប្រវេសន៍ច្រើន ដោយបង្កើតលទ្ធភាពនៃការប្រឈមមុខដាក់គ្នាជាមួយមន្ត្រីតំបន់ នៅក្នុងទីក្រុងជាច្រើនដែលហៅថាទីជម្រក ដូចជាក្រុងញូវយ៉ក និងឈីកាហ្គោជាដើម ដែលបានដាក់កម្រិតលើកិច្ចសហប្រតិបត្តិការជាមួយកិច្ចខិតខំប្រឹងប្រែងបែបនេះ។

អនុស្សរណៈថ្មីនេះបានគូសបញ្ជាក់ថា ក្រសួងយុត្តិធម៌របស់លោក Trump អាចព្យាយាមគាំទ្ររបៀបវារៈអន្តោប្រវេសន៍ដ៏ខ្លាំងក្លារបស់លោក ដោយពង្រីកការគំរាមកំហែងចោទប្រកាន់ព្រហ្មទណ្ឌទូលំទូលាយ លើសពីជនអន្តោប្រវេសន៍ ឬអ្នកដែលផ្តល់ការងារឱ្យពួកគេ ទៅដល់មន្ត្រីទីក្រុង និងរដ្ឋ៕