សេតវិមាន បានឲ្យដឹងថា ប្រធានាធិបតីអាមេរិក លោក Donald Trump កាលពីថ្ងៃពុធ (ទី២២ ខែមករា) បានកំណត់ឡើងវិញ ចំពោះចលនាហ៊ួទីរបស់ប្រទេសយេម៉ែន ដែលត្រូវបានគេស្គាល់ឈ្មោះផ្លូវការថា Ansar Allah ជា «អង្គការភេរវករបរទេស»។

ចំណាត់ការនេះនឹងដាក់ទណ្ឌកម្មធ្ងន់ធ្ងរជាងរដ្ឋបាលរបស់លោក Joe Biden ដែលបានអនុវត្តចំពោះក្រុមសម្ព័ន្ធមិត្តអ៊ីរ៉ង់ ដើម្បីជាការឆ្លើយតប ចំពោះការវាយប្រហាររបស់ក្រុមនេះលើការដឹកជញ្ជូនពាណិជ្ជកម្ម នៅសមុទ្រក្រហម និងលើនាវាចម្បាំងអាមេរិកដែលការពារផ្លូវទឹកដ៏សំខាន់នេះ។

សេតវិមានបានឲ្យដឹងនៅក្នុងសេចក្តីថ្លែងការណ៍ថា៖ «សកម្មភាពរបស់ក្រុមហ៊ួទី គំរាមកំហែងដល់សន្តិសុខរបស់ជនស៊ីវិល និងបុគ្គលិកអាមេរិក នៅតំបន់មជ្ឈិមបូព៌ា សុវត្ថិភាពនៃដៃគូក្នុងតំបន់ដ៏ជិតស្និទ្ធបំផុតរបស់យើង និងស្ថិរភាពនៃពាណិជ្ជកម្មដែនសមុទ្រពិភពលោក»។

យ៉ាងណាក្ដី អ្នកគាំទ្រនៃចំណាត់ការនេះ លើកឡើងថា វាគឺយឺតពេលហើយ ទោះបីជាអ្នកជំនាញខ្លះ និយាយថា វាអាចមានផលប៉ះពាល់ដល់នរណាម្នាក់ដែលត្រូវបានគេមើលឃើញថា ជាអ្នកផ្តល់ជំនួយដល់ក្រុមហ៊ួទី ក្នុងនោះរួមទាំងអង្គការជំនួយមួយចំនួនផងដែរ។

គួររំលឹកថា ក្រុមហ៊ួទីដែលគ្រប់គ្រងភាគច្រើនលើប្រទេសយេម៉ែន បានធ្វើការវាយប្រហាជាង ១០០លើកលើនាវានានាដែលធ្វើដំណើរនៅសមុទ្រក្រហម គិតចាប់តាំងពីខែវិច្ឆិកា ឆ្នាំ២០២៣ ដោយប្រាប់ហេតុផលថា ពួកគេកំពុងធ្វើសកម្មភាព ដើម្បីបង្ហាញសាមគ្គីភាពជាមួយប៉ាឡេស្ទីន ជុំវិញសង្គ្រាមរបស់អ៊ីស្រាអែលប្រឆាំងនឹងក្រុមហាម៉ាស នៅតំបន់ហ្កាហ្សា។ ពួកគេបានវាយប្រហារបណ្ដាលឲ្យនាវាលិច ២គ្រឿង រឹបអូសបាន ១គ្រឿង និងបានសម្លាប់អ្នកដើរតាមនាវាយ៉ាងតិច ៤នាក់៕