ប្រជាជនដែលភៀសខ្លួនចេញពីការប្រយុទ្ធគ្នាថ្មី ក្នុងសាធារណរដ្ឋប្រជាធិបតេយ្យកុងហ្គោ បានចុះពីទូកដែលមានមនុស្សច្រើនយ៉ាងច្រើនណែនណាន់តាន់តាប់ ក្នុងទីក្រុង Goma កាលពីថ្ងៃពុធ (ទី២២ ខែមករា) ដោយស្វែងរកទីជ្រកកោនសុវត្ថិភាព បន្ទាប់ពីក្រុមឧទ្ទាម M23 បានដណ្តើមគ្រប់គ្រងផ្លូវផ្គត់ផ្គង់ដ៏សំខាន់មួយ សម្រាប់រដ្ឋធានីរបស់ខេត្ត។

អភិបាលតំបន់ និងជាមេដឹកនាំក្រុមឧទ្ទាម កាលពីថ្ងៃអង្គារ (ទី២១ ខែមករា) បាននិយាយថា ក្រុមឧទ្ទាម M23 ដឹកនាំដោយក្រុម Tutsi បានដណ្តើមគ្រប់គ្រងទីក្រុងភាគខាងកើត Minova។ កងទ័ពបានរាយការណ៍ពីការប្រយុទ្ធគ្នានៅគ្រប់សមរភូមិមុខ។

ជនភៀសខ្លួនរាប់រយនាក់ បានធ្វើដំណើរទៅកាន់ទីក្រុង Goma។ អ្នកខ្លះបានរៀបរាប់ពីការភៀសខ្លួនជាច្រើនដង ដោយសារសមរភូមិជួរមុខ បានប្រែប្រួល និងដើរជាច្រើនថ្ងៃដោយគ្មានអាហារ ឬជម្រកជ្រកកោន។ អ្នកភៀសខ្លួនម្នាក់ បាននិយាយថា៖ «ខ្ញុំឃ្លានខ្លាំងណាស់។ ខ្ញុំបានចាកចេញពីទីក្រុង Minova កាលពីម្សិលមិញទៅតំបន់ Nzulo ប៉ុន្តែស្ថានភាពនៅ Nzulo ក៏មិនល្អដែរ។ ដូច្នេះឥឡូវនេះ ខ្ញុំកំពុងធ្វើដំណើរទៅកន្លែងផ្សេង ប៉ុន្តែខ្ញុំមិនដឹងថា កន្លែងណានោះទេ»។

មេដឹកនាំសង្គមស៊ីវិលម្នាក់ បានប្រាប់សារព័ត៌មាន Reuters ថា កងកម្លាំងរដ្ឋាភិបាល បានប្រយុទ្ធ ដើម្បីការពារទីក្រុង Minova ប៉ុន្តែនៅទីបំផុត ត្រូវបានវាយឲ្យដកថយ។

គួរបញ្ជាក់ថា ក្រុមឧទ្ទាម M23 បានធ្វើការបះបោរជាថ្មី នៅភាគខាងកើតនៃប្រទេសអាហ្រ្វិកកណ្តាលមួយនេះ ចាប់តាំងពីឆ្នាំ២០២២។ ប្រទេសកុងហ្គោ និងអង្គការសហប្រជាជាតិ បានចោទប្រកាន់ប្រទេសជិតខាងរ៉្វាន់ដាថាបានជួយគាំទ្រក្រុមនេះ ដោយផ្ដល់ជំនួយកងទ័ព និងអាវុធផ្ទាល់ខ្លួន។ រ៉្វាន់ដាបដិសេធការចោទប្រកាន់នេះ៕