បេសកជនពិសេសរបស់អង្គការសហប្រជាជាតិប្រចាំប្រទេសស៊ីរី លោក Geir Pedersen កាលពីថ្ងៃពុធ បានរៀបរាប់អំពីឧបសគ្គចំនួន ៧ ដែលថ្នាក់ដឹកនាំថ្មីរបស់ប្រទេសស៊ីរី កំពុងប្រឈម រាប់ចាប់ពីការរួមបញ្ចូលក្រុមប្រឆាំងប្រដាប់អាវុធ ទៅជាកម្លាំងជាតិតែមួយ រហូតដល់ការបញ្ចប់ការដាក់ទណ្ឌកម្ម និងជំរុញការស្តារសេដ្ឋកិច្ចឡើងវិញ។

លោក Pedersen បានប្រាប់អ្នកសារព័ត៌មានក្នុងអំឡុងសន្និសីទសារព័ត៌មាន នៅទីក្រុងដាម៉ាស( Damascus)ថា៖«លេខ១ គឺការបង្រួបបង្រួមក្រុមប្រដាប់អាវុធ នៅក្រោមកងទ័ពជាតិ»។ «លេខ២ ទាក់ទងនឹងបញ្ហាប្រឈមជាក់លាក់ នៅភាគឦសាន ហើយទី៣ គឺធានាការការពារសម្រាប់ប្រជាជនស៊ីរីទាំងអស់។ ទី៤ ដូចដែលខ្ញុំបានលើកឡើងពីមុន គឺការផ្លាស់ប្តូរនយោបាយ។ ទី៥ គឺយុត្តិធម៌អន្តរកាល។ ទី៦ គឺបញ្ហាទណ្ឌកម្ម ការស្តារសេដ្ឋកិច្ច និង ការកសាងឡើងវិញ និង ទី៧ជាចុងក្រោយ គឺវត្តមានរបស់ អ៊ីស្រាអែល»។

លោក Pedersen បានសង្កត់ធ្ងន់ថា ការផ្លាស់ប្តូរនយោបាយដែលមានរដ្ឋធម្មនុញ្ញថ្មី និងការបោះឆ្នោតដោយសេរី ត្រូវតែ «ដឹកនាំដោយស៊ីរីនិងជាកម្មសិទ្ធិរបស់ស៊ីរី» ដើម្បីទទួលបានជោគជ័យ។ លោកបានមានថ្លែងថា៖«យើងត្រូវការការផ្លាស់ប្តូរទាំងស្រុង»។

បេសកជនUN រូបះ ក៏បានអំពាវនាវឲ្យមានការដកទណ្ឌកម្ម ដើម្បីពន្លឿនការកសាងប្រទេសស៊ីរីឡើងវិញ ដោយបន្ថែមថា ប្រហែលជាត្រូវការពេលវេលា មុនពេលដែលអាចធ្វើការចរចាអំពីការបន្ធូរបន្ថយទណ្ឌកម្មបែបនេះ ជាមួយរដ្ឋាភិបាលសហរដ្ឋអាមេរិក។