អ៊ីស្រាអែលបាននិយាយថា ខ្លួននឹងបន្តការគ្រប់គ្រងច្រកព្រំដែន Rafah រវាងប្រទេសអេហ្ស៊ីប និងតំបន់ហ្កា ហ្សាស្ទ្រីប ក្នុងអំឡុងដំណាក់កាលដំបូងនៃបទឈប់បាញ់ជាមួយក្រុមហាម៉ាស។

សេចក្តីថ្លែងការណ៍របស់ការិយាល័យនាយករដ្ឋមន្ត្រី លោក បេនចាមីន ណេតាន់យ៉ាហ៊ូ (Benjamin Netanyahu) កាលពីថ្ងៃពុធ បានបដិសេធរបាយការណ៍ដែលថា អាជ្ញាធរប៉ាឡេស្ទីន នឹងគ្រប់គ្រងច្រក ឆ្លងកាត់នេះ។

បទឈប់បាញ់ ដែលឥឡូវនេះ ស្ថិតនៅក្នុងថ្ងៃទី ៤ របស់ខ្លួន ត្រូវបានគេសន្មត់ថា នឹងនាំមកនូវភាពស្ងប់ស្ងាត់ដល់តំបន់ហ្កាហ្សា ដែលទទួលរងនូវសង្រ្គាមយ៉ាងហោចណាស់ ៦សប្តាហ៍ ហើយឃើញចំណាប់ថ្នូរចំនួន ៣៣នាក់ ដែលក្រុមហាម៉ាសបានចាប់ ត្រូវបានដោះលែងជាថ្នូរនឹងប្រជាជនប៉ាឡេស្ទីនរាប់រយនាក់ដែលត្រូវបានចាប់ឃុំឃាំងដោយអ៊ីស្រាអែល។

សេចក្តីថ្លែងការណ៍ បានឲ្យដឹងថា អ្នកឃ្លាំមើលសហភាពអឺរ៉ុប នឹងត្រួតពិនិត្យច្រកឆ្លងកាត់ដែលនឹងត្រូវបានឡោមព័ន្ធដោយទាហានអ៊ីស្រាអែល។ អ៊ីស្រាអែល ក៏នឹងយល់ព្រមលើការធ្វើដំណើររបស់ប្រជាជន និងការដោះដូរទំនិញផ្សេងៗ។

សង្រ្គាមបានចាប់ផ្តើម នៅពេលដែលក្រុមសកម្មប្រយុទ្ធដឹកនាំដោយក្រុមហាម៉ាស បានវាយលុកចូលទៅក្នុងប្រទេសអ៊ីស្រាអែល កាលពីថ្ងៃទី ០៧ ខែតុលា ឆ្នាំ ២០២៣ ដោយបានសម្លាប់មនុស្សប្រហែល ១.២០០នាក់ ភាគច្រើនជាជនស៊ីវិល និងបានចាប់ពង្រត់ប្រហែល ២៥០នាក់។ ចំណាប់ថ្នូរប្រហែល ១០០នាក់ នៅតែស្ថិតក្នុងតំបន់ហ្កាហ្សា បន្ទាប់ពីអ្នកផ្សេង ត្រូវបានដោះលែង ជួយសង្គ្រោះ ឬសាកសពរបស់ពួកគេ ត្រូវបានយកត្រឡប់មកវិញ។