ប្រធានាធិបតីអាមេរិក លោក Donald Trump កាលពីថ្ងៃពុធ (ទី២២ ខែមករា) បានបង្ហើបការបញ្ចប់ការផ្តល់ជំនួយសង្គ្រោះគ្រោះមហន្តរាយសហព័ន្ធ ហើយទុកឲ្យរដ្ឋនានាដោះស្រាយបញ្ហាដោយខ្លួនឯង ក្នុងអំឡុងពេលមានគ្រោះអាសន្ន ដោយការលើកឡើងនេះមានក្នុងបទសម្ភាសន៍លើកដំបូង នៅឯការិយាល័យ Oval Office គិតចាប់តាំងពីបានវិលទៅកាន់អំណាចវិញ។

ដោយទីក្រុង Los Angeles ដែលត្រូវបានបំផ្លិចបំផ្លាញដោយចំហេះព្រៃ ហើយភាគខាងកើតសហរដ្ឋអាមេរិក នៅតែត្រដាបត្រដួសមិនទាន់ប្រសើរឡើងវិញ ដោយសារខ្យល់ព្យុះដ៏ខ្លាំងក្លាចំនួន២ លោក Trump បានចោទប្រកាន់ភ្នាក់ងារគ្រប់គ្រងគ្រោះអាសន្នសហព័ន្ធ (Fema) ថា បានទុកជនរងគ្រោះចោល។

លោក Trump បានប្រាប់ប្រព័ន្ធផ្សព្វផ្សាយ Fox News ថា៖ «Fema មិនបានបំពេញតួនាទីរបស់ពួកគេ រយៈពេល ៤ឆ្នាំចុងក្រោយនេះ។ អ្នកដឹងទេ ខ្ញុំធ្លាប់មាន Fema ដែលធ្វើការបានយ៉ាងល្អ។ យើងមានមហន្តរាយ ដោយសារព្យុះសង្ឃរា នៅរដ្ឋ Florida និងព្យុះកួច នៅ Alabama»។

លោកបានបន្ថែមថា៖ «ប៉ុន្តែលុះត្រាណាតែអ្នកមានប្រភេទនៃភាពជាអ្នកដឹកនាំច្បាស់លាស់ នោះទើបវាអាចដោះស្រាយបញ្ហាបានយ៉ាងមានប្រសិទ្ធភាព។ ហើយ Fema នឹងក្លាយជាការពិភាក្សាដ៏ធំពេញលេញ ក្នុងរយៈពេលដ៏ខ្លីនេះ ព្រោះខ្ញុំចង់ឃើញរដ្ឋនានាដោះស្រាយបញ្ហាផ្ទាល់របស់ពួកគេ»។

គួរបញ្ជាក់ថា ការកត់សម្គាល់របស់លោក Trump បានកើតឡើងនៅពេលដែលចំហេះព្រៃថ្មីមួយ បានឆាបឆេះឡើងនៅភាគខាងជើងនៃទីក្រុង Los Angeles ដែលបង្ខំឲ្យមនុស្សរាប់ម៉ឺននាក់ត្រូវជម្លៀសចេញពីផ្ទះសម្បែងរបស់ពួកគេ និងបង្កឲ្យមានការព្រួយបារម្ភក្នុងតំបន់មួយដែលនៅតែមិនទាន់រួចផុតពីស្ថានភាពអាក្រក់ ដោយសារតែចំហេះដ៏អាក្រក់បំផុតចំនួន ២៕