ក្រុមមន្ត្រី បានប្រាប់ឲ្យដឹងថា ចំនួនអ្នកស្លាប់ដោយសារបំណាក់ដី នៅលើកោះជ្វារបស់ប្រទេសឥណ្ឌូនេស៊ី បានកើនឡើងដល់យ៉ាងតិច ២១នាក់ ខណៈ ៥នាក់ផ្សេងទៀត នៅតែបាត់ខ្លួន គិតត្រឹមថ្ងៃព្រហស្បតិ៍ (ទី២៣ ខែមករា) ខណៈដែលក្រុមអ្នកជួយសង្គ្រោះ បានធ្វើការយ៉ាងសស្រាក់សស្រាំ ក្នុងស្ថានភាពអាកាសធាតុដ៏អាក្រក់ ដើម្បីស្វែងរកអ្នកនៅមានជីវិត។

គួរបញ្ជាក់ថា ភ្លៀងធ្លាក់ខ្លាំង កាលពីថ្ងៃទី២០ ខែមករា នៅតំបន់ភ្នំក្បែរទីក្រុង Pekalongan ក្នុងខេត្តជ្វាកណ្ដាល (Central Java) បានបង្កឲ្យមានបំណាក់ដី ដែលបណ្ដាលឲ្យបាក់ស្ពាន ហើយកប់រថយន្ត និងផ្ទះសម្បែង។

ប្រធានទីភ្នាក់ងារស្វែងរក និងជួយសង្គ្រោះមកពីទីក្រុងក្បែរនោះ Semarang គឺលោក Budiono បាននិយាយប្រាប់សារព័ត៌មាន AFP ថា៖ «គិតត្រឹមព្រឹកនេះ យើងបានរកឃើញជនរងគ្រោះចំនួន ២១នាក់ដែលបានបាត់បង់ជីវិត ហើយនៅមាន ៥នាក់ទៀតដែលកំពុងត្រូវបានស្វែងរក»។

ឧបករណ៍ធុនធ្ងន់ៗ ត្រូវបានដាក់ពង្រាយទៅកាន់ភូមិ Kasimpar ដែលរងគ្រោះខ្លាំងបំផុត ដើម្បីស្វែងរកតាមបំណែកបាក់បែករបស់ផ្ទះនៃមន្ត្រីមូលដ្ឋាន ក៏ដូចជាហាងកាហ្វេ ជាកន្លែងដែលជនរងគ្រោះជាច្រើនត្រូវបានគេគិតថា កប់នៅក្នុងនោះ ខណៈដែលពួកគេស្វែងរកទីជ្រកភ្លៀង។

យោងតាមទីភ្នាក់ងាររុករក និងជួយសង្គ្រោះ Basarnas បានឲ្យដឹងថា យ៉ាងហោចណាស់មនុស្ស ១៣នាក់ ក៏បានរងរបួសផងដែរនៅក្នុងហេតុការណ៍បំណាក់ដីនេះ៕