នាយករដ្ឋមន្ត្រីអាល់បានី លោក Edi Rama ដែលកាលពីខែធ្នូ ឆ្នាំ២០២៤ បានប្រកាសហាមប្រាមរយៈពេល ២ឆ្នាំ ចំពោះ TikTok បាននិយាយថា នៅសប្តាហ៍នេះ លោកបានធ្វើការពិភាក្សា «ប្រកបដោយភាពបើកចំហ និងស្ថាបនា» ជាមួយបណ្ដាញសង្គមមួយនេះ។

លោក Rama បាននិយាយអំពីវេទិកាដែលគ្រប់គ្រងដោយជនជាតិចិននេះថា ទីក្រុងទីរ៉ាណា (Tirana) នឹង «បង្ខំឲ្យបណ្ដាញសង្គមនេះចាកចេញពីសហគមន៍របស់យើង» នៅពេលដែលលោកប្រកាសពីបម្រាម ដែលគ្រោងមានសុពលភាពពេញមួយឆ្នាំ២០២៥ នេះ។ ហើយលោកក៏បានប្រកាសផងដែរថា រដ្ឋាភិបាលនឹងដាក់ចេញនូវកម្មវិធីដែល «បម្រើដល់ការអប់រំដល់សិស្ស-និស្សិត និងជួយដល់មាតាបិតាតាមដានដំណើររបស់កូនៗពួកគេ»។

ប៉ុន្តែបន្ទាប់ពីមានការពិភាក្សាជាមួយលោកស្រី Christine Grahn ដែលជាមន្ត្រីជាន់ខ្ពស់ម្នាក់របស់ TikTok នៅអឺរ៉ុប លោកបានលើកឡើងថា ការផ្លាស់ប្តូរគោលនយោបាយ អាចកើតមាន។ លោក Rama បានឲ្យដឹងនៅលើគណនី Facebook របស់លោក កាលពីថ្ងៃទី២១ ខែមករាថា «យើងបានពិភាក្សាអំពីកង្វល់ដែលនាំឲ្យយើងផ្អាកការចូលទៅប្រើប្រាស់កម្មវិធីនេះបណ្តោះអាសន្ន ក្នុងប្រទេសអាល់បានី»។

លោក Rama ដែលបានជួបលោកស្រី Grahn នៅទីក្រុង Davos ប្រទេសស្វីស បានបន្ថែមថា៖ វាគឺជាការពិភាក្សា ប្រកបដោយភាពបើកចំហ និងការស្ថាបនាយ៉ាងពេញលេញ ដែលយើងបានឈានដល់ការសហការសំខាន់ជាច្រើន សម្រាប់សប្តាហ៍ និងខែខាងមុខ។ បើមិនដូច្នេះទេ យើងនឹងមានកាតព្វកិច្ចបន្តបិទការចូលទៅប្រើប្រាស់កម្មវិធីនេះ»។

ប្រភពពី TikTok កាលពីថ្ងៃពុធ (ទី២២ ខែមករា) បានបង្ហាញប្រាប់សារព័ត៌មាន AFP ថា «វាគឺជាជំនួបប្រកបដោយការស្ថាបនា ដោយមានកិច្ចព្រមព្រៀង ដើម្បីធ្វើការជាមួយរដ្ឋាភិបាលដោះស្រាយរាល់កង្វល់នានា»៕