សភាអឺរ៉ុបកាលពីថ្ងៃពុធ បានបោះឆ្នោតផ្តល់អនុសាសន៍ដល់សហភាពអឺរ៉ុប កុំឲ្យទទួលស្គាល់ការបោះឆ្នោតប្រធានាធិបតី នៅប្រទេសបេឡារុស ដែលគ្រោងធ្វើ នៅថ្ងៃទី ២៦ ខែមករានេះ។

អនុសាសន៍នេះត្រូវបានអនុម័តដោយសំឡេងគាំទ្រ៤២៩ទល់ជំទាស់២០៥សំឡេង ដោយ២៣សំឡេង   អនុប្បវាទ។

សមាជិកសភា ក៏បានអំពាវនាវឲ្យបង្កើនការដាក់ទណ្ឌកម្មប្រឆាំងនឹងបេឡារុស ដោយចោទប្រកាន់អាជ្ញាធររបស់ខ្លួនអំពីការរំលោភសិទ្ធិមនុស្ស។

សភាអ៊ឺរ៉ុប គឺជាស្ថាប័នផ្តល់ប្រឹក្សា ហើយដំណោះស្រាយរបស់ខ្លួន មិនជាប់ពាក់ព័ន្ធនឹងស្ថាប័ន EU ទេ។

កាលពីព្រឹកថ្ងៃពុធ អ្នកនាំពាក្យក្រសួងការបរទេសបេឡារុស លោក Anatoly Glaz បាននិយាយថា ការវាយតម្លៃរបស់អឺរ៉ុបអំពីការបោះឆ្នោត នៅក្នុងប្រទេសនេះ គឺមានភាពលម្អៀង។ យោងតាមអ្នកនាំពាក្យរូបនេះ ក្រសួងទទួល បានសេចក្តីថ្លែងការណ៍ថា សេវាសកម្មភាពខាងក្រៅរបស់អឺរ៉ុប គ្រោងនឹងចេញក្រោយការបោះឆ្នោត ដោយផ្អែកលើដំណោះស្រាយរបស់សភាអឺរ៉ុប។ លោកបាននិយាយថា សេចក្តីថ្លែងការណ៍នោះ មានភាពមិនពិតតាំងពីដើមដំបូង។ ចំពោះការចោទប្រកាន់ថា ការទទួលបានសិទ្ធិនៃប្រព័ន្ធផ្សព្វផ្សាយឯករាជ្យ ទៅកាន់ការបោះឆ្នោតនានា មានកម្រិត លោកបានឆ្លើយថា សារព័ត៌មានបរទេសប្រហែល ៣៣០ នាក់ ដែលតំណាងឲ្យស្ថាប័នព័ត៌មានឈានមុខគេរបស់ពិភពលោក ត្រូវបានគេទទួលស្គាល់ ដើម្បីរាយការណ៍អំពីការបោះឆ្នោតនេះ។ លោកក៏បាននិយាយផងដែរថា ការបោះឆ្នោតនៅប្រទេសបេឡារុស ទើបតែចាប់ផ្តើម ប៉ុន្តែសេចក្តីថ្លែងការណ៍ «បានថ្កោលទោស និងបដិសេធមិនទទួលស្គាល់អ្វីៗទាំងអស់»រួចហើយ។