រដ្ឋឥស្លាមបានអះអាងទទួលខុសត្រូវ ចំពោះការសម្លាប់ជនជាតិចិនម្នាក់ នៅក្នុងខេត្ត Takhar ភាគខាងជើងនៃប្រទេសអាហ្វហ្គានីស្ថាន តាមរយៈការបង្ហោះ នៅលើបណ្តាញ Telegram របស់ខ្លួន កាលពីល្ងាចថ្ងៃពុធ (ទី២២ ខែមករា) នេះ។

គួរបញ្ជាក់ថា កាលពីថ្ងៃពុធ នគរបាលអាហ្វហ្គានីស្ថាន នៅក្នុងខេត្តនេះ បានប្រាប់ឲ្យដឹងថា ជនជាតិចិនម្នាក់ ត្រូវបានសម្លាប់ ហើយការស៊ើបអង្កេតបឋម ត្រូវបានចាប់ផ្តើម ប៉ុន្តែខ្លួននៅមិនទាន់ដឹងច្បាស់ទេថា តើអ្នកណាជាអ្នកនៅពីក្រោយការវាយប្រហារនេះ។

ក្រុមរដ្ឋឥស្លាម បានប្រាប់ថា ខ្លួនបានកំណត់គោលដៅវាយប្រហារលើរថយន្តដឹកជនជាតិចិន ដែលបានបណ្ដាលឲ្យជនរងគ្រោះស្លាប់ និងខូចខាតរថយន្ត។

ក្រសួងការបរទេសចិន នៅថ្ងៃព្រហស្បតិ៍ (ទី២៣ ខែមករា) នេះ បានលើកឡើងថា ខ្លួនតក់ស្លុតយ៉ាងខ្លាំង ចំពោះការវាយប្រហារនេះ ហើយបានទាមទារឲ្យភាគីអាហ្វហ្គានីស្ថានស៊ើបអង្កេតយ៉ាងម៉ត់ចត់ ចំពោះហតុការណ៍នេះ និងដាក់ទោសយ៉ាងធ្ងន់ធ្ងរ ចំពោះជនល្មើស។

ចិន គឺជាប្រទេសដំបូងគេដែលតែងតាំងឯកអគ្គរដ្ឋទូតប្រចាំនៅអាហ្វហ្គានីស្ថាន ក្រោមការគ្រប់គ្រងរបស់ក្រុមតាលីបង់ ហើយបាននិយាយថា ខ្លួនចង់លើកកម្ពស់ទំនាក់ទំនងពាណិជ្ជកម្ម និងវិនិយោគ។ ក្រុមតាលីបង់បានចូលកាន់កាប់ប្រទេស នៅឆ្នាំ២០២១ ដោយសន្យាថា នឹងស្តារឲ្យមានសន្តិសុខឡើងវិញ សម្រាប់ប្រទេសដែលហែកហួរដោយសង្រ្គាមមួយនេះ៕