មនុស្សម្នាក់ស្លាប់ និងមនុស្ស ២៥នាក់ផ្សេងទៀត បានរងរបួស ក្នុងការវាយប្រហារមីស៊ីល និងយានដ្រូនរបស់រុស្ស៊ីលើទីក្រុងភាគអាគ្នេយ៍ Zaporizhzhia របស់ប្រទេសអ៊ុយក្រែន នៅព្រឹកទាបភ្លឺថ្ងៃព្រហស្បតិ៍នេះ ។

លោក Ivan Fedorov គឺជាអភិបាលក្រុង Zaporizhzhia និយាយថា អ្នកស្រុកជាង ២ម៉ឺននាក់ គ្មានចរន្តអគ្គិសនីប្រើប្រាស់ និងមនុស្ស ១៧.០០០នាក់ផ្សេងទៀត គ្មានកម្តៅ ដោយសារការវាយប្រហារកាលពីយប់រំលងអាធ្រាត្រកន្លងទៅ ក្នុងនោះរោងចក្រថាមពលមួយកន្លែង ត្រូវបានបំផ្លាញ ។

រុស្ស៊ី បានបើកការវាយប្រហារតាមច្រកអាកាសជាញឹកញាប់លើទីក្រុងតូច-ធំរបស់អ៊ុយក្រែននៅតាមខ្សែត្រៀមមុខ អំឡុងការវាយលុករយៈពេល ៣ឆ្នាំរបស់ពួកគេ ជាពិសេសពួកគេមានគោលដៅវាយប្រហារលើបណ្តាញថាមពលចុះខ្សោយរបស់ប្រទេសមួយនេះ ។

លោក Serhii គឺជាពលរដ្ឋវ័យ ៣៥ឆ្នាំមួយរូបដែលផ្ទះរបស់លោករងការបំផ្លិចបំផ្លាញ និយាយថា មាននូវការផ្ទុះដ៏ធំមួយ ។ ភរិយារបស់លោករត់ទៅទ្វារ ដើម្បីស្វែងរកជម្រកការពារគ្រាប់ ។ 

លោកបន្តថា លោកបានធ្លាក់ពីលើសាឡុង លោកបានរត់ទៅទូខោអាវ លោកត្រូវបានគ្របពីលើដោយកម្ទេចកម្ទី លោកអាចចេញមកក្រៅវិញបាន ហើយក៏ឮភរិយារបស់លោកស្រែកឲ្យជួយ លោកឃើញភរិយាចេញឈាម លោកបានខំអស់ពីលទ្ធភាពដើម្បីនាំភរិយាទៅកាន់ជម្រកការពារគ្រាប់ ពីព្រោះថា មាននូវការផ្ទុះគ្រាប់បន្ថែមទៀត ៕