ក្បួនរថយន្តដឹកជំនួយមនុស្សធម៌ បានធ្វើដំណើរយឺតៗ តាមផ្លូវលំបាកមានភក់ ភ្លៀងធ្លាក់ និងបែកកង់រថយន្ត ចូលទៅកាន់ទីក្រុង Rafah របស់តំបន់ហ្កាហ្សា នៅថ្ងៃទី ៥នៃបទឈប់បាញ់រវាងអ៊ីស្រាអែល និងក្រុមហាម៉ាស់ ។

ខណៈពេលនោះដែរ អ៊ីស្រាអែលនិយាយថា ខ្លួននឹងបន្តការគ្រប់គ្រងច្រកព្រំដែន Rafah រវាងប្រទេសអេហ្ស៊ីប និងតំបន់ហ្កាហ្សាស្ទ្រីប ក្នុងអំឡុងដំណាក់កាលដំបូងនៃបទឈប់បាញ់ជាមួយក្រុមហាម៉ាស ។ 

សេចក្តីថ្លែងការណ៍របស់ការិយាល័យនាយករដ្ឋមន្ត្រីអ៊ីស្រាអែល លោក Benjamin Netanyahu កាលពីថ្ងៃពុធ បានបដិសេធរបាយការណ៍ដែលថា អាជ្ញាធរប៉ាឡេស្ទីន នឹងគ្រប់គ្រងច្រកឆ្លងកាត់មួយនេះ ។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ(OCHA) បាននិយាយថា រថយន្តដឹកជំនួយមនុស្សធម៌ចំនួន ៨០៨គ្រឿង បានចូលទៅក្នុងតំបន់ហ្កាហ្សាស្រ្ទីប កាលពីថ្ងៃពុធ ។

OCHA បានលើកឡើងព័ត៌មានទទួលបានពីក្រុមអាជ្ញាធរអ៊ីស្រាអែល និងក្រុមអ្នកធានាសម្រាប់កិច្ចព្រមព្រៀងបទឈប់បាញ់ គឺសហរដ្ឋអាមេរិក អេហ្ស៊ីប និងកាតា ។

នៅក្នុងរយៈពេលប៉ុន្មានថ្ងៃកន្លងមកនេះ ចាប់តាំងពីបទឈប់បាញ់ចូលជាធរមានកាលពីថ្ងៃអាទិត្យ រដ្ឋបាលគ្រប់គ្រងដោយក្រុមហាម៉ាស់ បានរួសរាន់ធ្វើការធានាសន្តិសុខឡើងវិញ ទប់ស្កាត់ការលួច និងចាប់ផ្តើមស្តាឡើងវិញសេវាកម្មថ្នាក់មូលដ្ឋាន នៅតាមតំបន់មួយចំនួនក្នុងដែនដីបិទច្រកមួយនេះ ៕