បាល់ទាត់៖ ក្រុមព្រះខ័នរាជស្វាយរៀងបានឡើងវគ្គ ៨ក្រុមចុងក្រោយ ឬវគ្គ ១/៤ ផ្ដាច់ព្រ័ត្រនៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ ហើយ ក្រោយទម្លាក់ក្រុមជើងឯកពានសម្ដេចតេជោ ហ៊ុន សែន-ថ្នាក់ខេត្តកោះកុងអេហ្វស៊ីដោយលទ្ធផល ៦-១ ត្រឹមវគ្គ ១៦ក្រុមចុងក្រោយលើទឹកដីរបស់ខ្លួនកាលពីល្ងាចថ្ងៃទី០៩ ខែវិច្ឆិកាម្សិលមិញ។
ជំនួបវគ្គចាញ់ធ្លាក់នេះ ព្រះខ័នរាជស្វាយរៀងបានបើកការនាំមុខក្រុមភ្ញៀវ ៣គ្រាប់មុននៅវគ្គទី១ ដែលធ្វើសម្រេចដោយកីឡាករ ឃៀង ម៉េងហួរ ២គ្រាប់ ខណៈ ១គ្រាប់ទៀតគឺជាគ្រាប់បាល់ស៊ុតបញ្ចូលទីខ្លួនឯងពីកីឡាករ ទីតេង មរកត។ រីឯវគ្គទី២ ក្រុមលោក Conor Nestor បានបន្ថែម ៣គ្រាប់ទៀតដោយកីឡាករ ម៉ុន វ៉ាន់ដា ២គ្រាប់ និង មិន រតនៈ ១គ្រាប់ មុនកីឡាករ សាន បូរ៉ា វាយបកបាន ១គ្រាប់វិញឲ្យក្រុមកោះកុងអេហ្វស៊ីនៅនាទី៩០+២។
ជ័យជម្នះនេះបានធ្វើឲ្យអតីតក្រុមជើងឯក ៤សម័យ ព្រះខ័នរាជស្វាយរៀងត្រូវឈរចាំគូប្រជែងនៅវគ្គ ១/៤ផ្ដាច់ព្រ័ត្ររវាងក្រុមអង្គរថាយហ្គឺរ ឬខេត្តព្រៃវែងដែលក្រុមទាំងពីរនឹងត្រូវជួបគ្នាក្នុងវគ្គ ១៦ក្រុមនាម៉ោង ៣រសៀលនេះនៅកីឡដ្ឋាន SRU ខេត្តសៀមរាប ហើយក្រុមទទួលបានជ័យជម្នះនឹងត្រូវឡើងទៅជួបក្រុមព្រះខ័នរាជស្វាយរៀង ដើម្បីប្រជែងកៅអីវគ្គផ្ដាច់ព្រ័ត្រដែលគ្រោងប្រកួតនាថ្ងៃទី១៦ ខែវិច្ឆិកាខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
