ឯកសារបណ្ដឹងនៅលើគេហទំព័ររបស់តុលាការ បានបង្ហាញកាលពីថ្ងៃព្រហស្បតិ៍ (២៣ មករា) សប្ដាហ៍នេះថា បណ្ដាក្រុមហ៊ុនរថយន្តអគ្គិសនី ឬហៅថា EV ធំៗរបស់ប្រទេសចិនដូចជា BYD, Geely និង SAIC បានដាក់បណ្ដឹងតតាំងនឹងពន្ធនាំចូលរបស់សហភាពអឺរ៉ុប នៅតុលាការយុត្តិធម៌របស់សហភាពអឺរ៉ុប (CJEU)។

សហភាពអឺរ៉ុប បានដាក់ពន្ធលើរថយន្ត EV ដែលផលិតនៅប្រទេសចិន នៅចុងខែតុលា បន្ទាប់ពីការស៊ើបអង្កេតប្រឆាំងនឹងការឧបត្ថម្ភធន រួមមាន ១៧,០% សម្រាប់ក្រុមហ៊ុន BYD, ១៨,៨% សម្រាប់ក្រុមហ៊ុន Geely និង ៣៥,៣% សម្រាប់ SAIC បន្ថែមពីលើពន្ធនាំចូលរថយន្តស្តង់ដារដែលមានស្រាប់របស់សហភាពអឺរ៉ុបចំនួន ១០%។

ឯកសាររបស់តុលាការបង្ហាញថា ក្រុមហ៊ុនទាំងបីបានដាក់ពាក្យបណ្តឹងរបស់ពួកគេនៅតុលាការជាន់ទាបមួយក្នុុងចំណោមពីររបស់តុលាការយុត្តិធម៌ CJEU នៅថ្ងៃអង្គារ (២១ មករា) សប្ដាហ៍នេះ មួយថ្ងៃមុនថ្ងៃផុតកំណត់សម្រាប់ការប្តឹងតវ៉ា។ ដំណើរការនៅតុលាការជាន់ទាបនោះនឹងមានរយៈពេលជាមធ្យម ១៨ខែ ហើយអាចប្តឹងឧទ្ធរណ៍បាន។

ការតតាំងផ្លូវច្បាប់របស់ក្រុមហ៊ុនចិនទាំងនោះទំនងជារួមបញ្ចូលអំណះអំណាងលើការវាយតម្លៃឧបត្ថម្ភធន ផលប៉ះពាល់ដល់ឧស្សាហកម្មសហភាពអឺរ៉ុប និងការសម្រេចមិនត្រឹមត្រូវរបស់គណៈកម្មាការអឺរ៉ុបក្នុងការបើកសំណុំរឿងដោយខ្លួនឯង ជាជាងធ្វើតាមបណ្ដឹងរបស់វិស័យឧស្សាហកម្ម៕