អតីតរដ្ឋមន្ត្រីការពារជាតិកូរ៉េខាងត្បូង ដែលត្រូវបានចោទប្រកាន់ពីបទបះបោរសម្រាប់តួនាទីរបស់លោកក្នុងការប៉ុនប៉ងដាក់ច្បាប់អាជ្ញាសឹករយៈពេលខ្លី បានប្រាប់តុលាការក្នុងន័យការពារលោកប្រធានាធិបតី Yoon Suk Yeol កាលពីថ្ងៃព្រហស្បតិ៍ (២៣ មករា) ថា លោកចង់បានការដាក់ពង្រាយយោធាទូលំទូលាយ ប៉ុន្តែត្រូវបានលោក Yoon បដិសេធ។

លោក Kim Yong-hyun ដែលបានលាលែងពីតំណែងបន្ទាប់ពីច្បាប់អាជ្ញាសឹកកាលពីថ្ងៃទី០៣ ខែធ្នូ ហើយឥឡូវនេះកំពុងជាប់ពន្ធនាគារនោះ បានផ្តល់សក្ខីកម្មនៅចំពោះមុខតុលាការធម្មនុញ្ញរបស់ប្រទេស ដែលកំពុងសម្រេចថា តើត្រូវដកលោក Yoon ចេញពីតំណែង ពេញលេញ ឬដាក់ឱ្យកាន់អំណាចវិញ បន្ទាប់ពីលោកត្រូវបានចោទប្រកាន់ទម្លាក់តំណែងកាលពីថ្ងៃទី១៤ ខែធ្នូ។

ចំណុចកណ្តាលនៃការការពារខ្លួនរបស់លោក Yoon គឺថាលោកមិនដែលមានបំណងដាក់ការគ្រប់គ្រងយោធាទេ ហើយប្រើប្រាស់ក្រឹត្យអាជ្ញាសឹកនេះគឺដើម្បីបំបែកភាពជាប់គាំងនយោបាយប៉ុណ្ណោះ។

នៅពេលត្រូវសាកសួរដោយមេធាវីរបស់លោក Yoon ថាតើប្រធានាធិបតីរូបនេះបានបដិសេធអនុសាសន៍របស់រដ្ឋមន្ត្រីការពារជាតិក្នុងការប្រមូលផ្តុំអង្គភាពយោធាទាំងអស់ដែលឈរជើងក្នុងទីក្រុងសេអ៊ូលដែរឬទេ លោក Kim ឆ្លើយថា "មែនហើយ"។ កាលពីថ្ងៃព្រហស្បតិ៍ លោក Kim ក៏បានទទួលស្គាល់ថា លោកជាអ្នកស្នើឱ្យលោក Yoon ប្រកាសច្បាប់អាជ្ញាសឹកដ៏ចម្រូងចម្រាស់នោះ៕