ការប្រកួតប្រជែងសម្រាប់ការវិនិយោគផ្ទាល់ពីបរទេស (FDI) នៅជុំវិញពិភពលោកកាន់តែមានភាពតានតឹងខ្លាំងឡើងៗជាងមុន។ បន្ទាប់ពីបានចូលដឹកនាំប្រទេសដែលទទួលបាន FDI ច្រើនជាងគេរបស់ពិភពលោករួចហើយនោះ លោកប្រធានាធិបតី Donald Trump បាននិយាយថា លោកមានបំណងធ្វើឲ្យប្រាក់ហូរចូលប្រទេសរបស់លោកកាន់តែច្រើនបន្ថែមទៀត។

អំឡុងពេលថ្លែងទៅកាន់អ្នកបង្កើតគោលនយោបាយ និងប្រមុខធុរកិច្ចកំពូលៗរបស់ពិភពលោក តាមរយៈវីដេអូអនឡាញពីសេតវិមាន លោក Trump បានផ្តល់នូវជម្រើសការយកពន្ធទាប ប្រសិនបើពួកគេនាំយកផលិតកម្មទៅកាន់សហរដ្ឋអាមេរិក ហើយបានគំរាមយកពន្ធខ្ពស់ ប្រសិនបើពួកគេមិនធ្វើដូច្នោះទេ។

នៅក្នុងសុន្ទរកថារបស់លោកទៅកាន់កិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WEF) នៅទីក្រុង Davos ប្រទេសស្វីស កាលពីថ្ងៃព្រហស្បតិ៍ (ទី២៣ ខែមករា) លោកបាននិយាយថា៖ «សាររបស់ខ្ញុំទៅកាន់គ្រប់ធុរកិច្ច នៅក្នុងពិភពលោក គឺសាមញ្ញណាស់។ ចូលមកបង្កើតផលិតផលរបស់អ្នក នៅអាមេរិក ហើយយើងនឹងផ្តល់ឲ្យអ្នកនូវកម្រិតពន្ធទាបបំផុតដែលដាក់ដោយប្រទេសណាមួយ នៅលើផែនដីនេះ»។

លោកបានសង្កត់ធ្ងន់ថា៖ «ប៉ុន្តែប្រសិនបើអ្នកមិនមកបង្កើតផលិតផលរបស់អ្នកនៅអាមេរិក ដែលជាការជ្រើសរើសរបស់អ្នក អ៊ីចឹងគឺងាយៗ អ្នកនឹងត្រូវបង់ពន្ធនាំចូល កម្រិតបង់ខុសៗគ្នា ប៉ុន្តែពន្ធខ្ពស់ ដែលនឹងនាំមកនូវទឹកប្រាក់រាប់រយពាន់លានដុល្លារ និងសូម្បីតែរាប់សែនកោដិដុល្លារចូលទៅក្នុងរតនាគាររបស់យើង ដើម្បីឲ្យយើងពង្រឹងសេដ្ឋកិច្ច និងទូទាត់បំណុល»។

គួរបញ្ជាក់ថា បើយោងតាមការិយាល័យវិភាគសេដ្ឋកិច្ចអាមេរិក ក្នុងរបាយការណ៍ចុងក្រោយរបស់ខ្លួននៃខែកក្កដា ឆ្នាំ២០២៤ បានឲ្យដឹងថា គិតត្រឹមឆ្នាំ២០២៣ ការវិនិយោគផ្ទាល់ពីបរទេសច្រើនឡើងៗ នៅសហរដ្ឋអាមេរិក បានកើនឡើងដល់ ៥,៣៩សែនកោដិដុល្លារ។ បំណុលជាតិរបស់សហរដ្ឋអាមេរិក មានចំនួនប្រហែល ៣៦សែនកោដិដុល្លារ៕