ប្រទេសរុស្ស៊ី កាលពីថ្ងៃព្រហស្បតិ៍ (ទី២៣ ខែមករា) បានថ្កោលទោសប្រមុខទីភ្នាក់ងារកុមាររបស់អង្គការសហប្រជាជាតិ គឺយូនីសេហ្វ (UNICEF) ចំពោះការមិនបានផ្តល់ «អំណះអំណាងដ៏ទម្ងន់ សម្រាប់ការបដិសេធរបស់លោកស្រី» ក្នុងការសង្ខេបប្រាប់ក្រុមប្រឹក្សាសន្តិសុខ ស្តីពីស្ថានភាពកុមារ នៅតំបន់ហ្កាហ្សា ជាកិច្ចប្រជុំដែលស្នើឡើងដោយរុស្ស៊ី។

ឯកអគ្គរដ្ឋទូតរុស្ស៊ីប្រចាំនៅអង្គការសហប្រជាជាតិ (UN) គឺលោក Vassily Nebenzia បាននិយាយថា នាយកប្រតិបត្តិអង្គការយូនីសេហ្វ លោកស្រី Catherine Russell ជាជនជាតិអាមេរិក បានរៀបរាប់សង្ខេបប្រាប់ក្រុមប្រឹក្សាដែលមានសមាជិក ១៥ប្រទេស ស្តីពីស្ថានភាពកុមារ នៅអ៊ុយក្រែន «ភ្លាមៗដោយមិនអល់អែក» កាលពីខែធ្នូឆ្នាំមុន ក្នុងអំឡុងពេលសហរដ្ឋអាមេរិកធ្វើជាប្រធានក្រុមប្រឹក្សា។

លោក Nebenzia បានសង្កត់ធ្ងន់ថា៖ «ដូច្នេះ វានឹងទំនងជាថា សម្រាប់យូនីសេហ្វ កុមារ នៅតំបន់ហ្កាហ្សា មិនសូវសំខាន់ជាងកុមារ នៅអ៊ុយក្រែននោះឡើយ»។

គួរដឹងថា រុស្ស៊ីបានលុកលុយប្រទេសជិតខាងអ៊ុយក្រែន ក្នុងខែកុម្ភៈ ឆ្នាំ២០២២ ហើយសង្រ្គាមបន្តមានតាំងពីពេលនោះមក។ ចំណែកសង្រ្គាម នៅតំបន់ហ្កាហ្សាស្ទ្រីប រវាងអ៊ីស្រាអែល និងក្រុមសកម្មប្រយុទ្ធហាម៉ាសប៉ាឡេស្ទីន បានចាប់ផ្តើមផ្ទុះឡើងនៅក្នុងខែតុលា ឆ្នាំ២០២៣ ហើយបទឈប់បាញ់បានចូលជាធរមាន នៅថ្ងៃទី១៩ ខែមករា។

លោក Nebenzia បានប្រាប់ក្រុមប្រឹក្សាថា៖ «ការបដិសេធរបស់ប្រមុខអង្គការយូនីសេហ្វ ក្នុងការសង្ខេបប្រាប់ក្រុមប្រឹក្សាសន្តិសុខ អំពីសោកនាដកម្មដ៏គួរឲ្យរន្ធត់ដែលទាក់ទងនឹងការស្លាប់របស់កុមាររាប់ម៉ឺននាក់នៅតំបន់ហ្កាហ្សា គឺជាកំហុសឆ្គងជាក់ស្ដែងដែលសមនឹងទទួលបានការរិះគន់ធ្ងន់ធ្ងរបំផុតរបស់យើង»។

អ្នកនាំពាក្យរបស់អង្គការយូនីសេហ្វ បានប្រាប់ថា លោកស្រី Russell កំពុងស្ថិតនៅឯវេទិកាសេដ្ឋកិច្ចពិភពលោក (WEF) នាទីក្រុង Davos ប្រទេសស្វីស ដោយផ្តោតលើការដោះស្រាយវិបត្តិមនុស្សធម៌ ហើយមិនអាចកែសម្រួលកាលវិភាគរបស់លោកស្រី ដើម្បីទៅសង្ខេបរបាយការណ៍ប្រាប់ក្រុមប្រឹក្សាសន្តិសុខបាននោះទេ៕