បាល់ទាត់៖ អតីតក្រុមជើងឯកពានសម្ដេចតេជោ ហ៊ុន សែន ឆ្នាំ២០១៣ ណាហ្គាវើលដ៏បានទម្លាក់អតីតក្រុមជើងឯកឆ្នាំ២០១៤ នគរបាលជាតិដោយការទាត់បាល់ប៉េណាល់ទីកាត់សេចក្ដី ៤-២ បន្ទាប់ពីវាយបកតាមស្មើ ១-១ ក្នុងជំនួបវគ្គ ១៦ក្រុមចុងក្រោយនៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ នៅកីឡដ្ឋានស្ដាតចាស់កាលពីល្ងាចថ្ងៃទី០៩-វិច្ឆិកាម្សិលមិញ។
ជំនួបដ៏តានតឹងនេះរវាងក្រុមសមាជិកលីគកំពូលកម្ពុជានេះ វគ្គទី១ មិនមានគ្រាប់បាល់កើតឡើងនោះទេ ខណៈចូលវគ្គទី២ កីឡាករ សំ វ៉ាន់និត មានឱកាសទាត់បាល់ពិន័យ ១១ម៉ែត្រជួយក្រុមនគរបាលជាតិបើកការនាំមុខ ១គ្រាប់មុនបន្ទាប់ពីបាល់ប៉ះដៃ យ៉េត ចិត្រា ក្នុងប្រអប់គ្រោះថ្នាក់។ តែនៅសល់ប្រមាណ ១០នាទីចុងក្រោយ ឃឹម បូរី បានលោតតែតបញ្ចូលទីយ៉ាងល្អជួយឲ្យក្រុមណាហ្គាវើលដ៏តាមស្មើវិញ ១-១។ ឈានដល់ការទាត់បាល់ប៉េណាល់ទីកាត់សេចក្ដី ក្រុមទាំងពីរបានចំណាយបាល់ទាត់ត្រឹម ៤ដងម្នាក់ប៉ុណ្ណោះក៏ដឹងឈ្នះ-ចាញ់ ពោលគឺការទាត់ ៤ដងរបស់ក្រុមណាហ្គាវើលដ៏ចូលទាំង ៤គ្រាប់ ខណៈការទាត់ ៤ដងរបស់ក្រុមនគរបាលជាតិចូលទី ២គ្រាប់ និងត្រូវបានជួយសង្គ្រោះដោយអ្នកចាំទី ស៊ូ យ៉ាទី ២គ្រាប់។ ការណ៍នេះធ្វើឲ្យក្រុមជើងឯករងឆ្នាំចាស់ណាហ្គាវើលដ៏ទទួលបានកៅអីវគ្គ ១/៤ផ្ដាច់ព្រ័ត្រតែម្ដង។
បច្ចុប្បន្នណាហ្គាវើលដ៏ត្រូវឈរចាំគូប្រកួតរបស់ខ្លួននៅវគ្គ ៨ក្រុមចុងក្រោយរវាងក្រុមនាគខៀវបឹងកេត និងក្រុមសូលទីឡូអង្គរ ដែលក្រុមទាំងពីរនឹងត្រូវប្រកួតវគ្គ ១៦ក្រុមចុងក្រោយនៅកីឡដ្ឋានខេមបូឌាអ៊ែរវ៉ែនាវេលាម៉ោង ៣រសៀលនេះ ហើយក្រុមណាឈ្នះនឹងត្រូវជួបក្រុមណាហ្គាវើលដ៏នាថ្ងៃទី១៦-វិច្ឆិកាខាងមុខ ដើម្បីប្រជែងកៅអីវគ្គពាក់កណ្ដាលផ្ដាច់ព្រ័ត្រនៃពានសម្ដេចតេជោនាយករដ្ឋមន្ដ្រី-ថ្នាក់ជាតិឆ្នាំនេះ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
