នៅក្នុងសុន្ទរកថានៅឯវេទិកាសេដ្ឋកិច្ចពិភពលោក(WEF)នៅទីក្រុង Davos កាលពីថ្ងៃព្រហស្បតិ៍ ប្រធានាធិបតីសហរដ្ឋអាមេរិក លោក ដូណាល់ ត្រាំ បានលើកឡើងពីតួនាទីសំខាន់នៃរដ្ឋបាលរបស់លោក ក្នុងការសម្របសម្រួលបទឈប់បាញ់ នៅតំបន់ហ្កាហ្សា និងធានាការដោះលែងចំណាប់ថ្នូរ។

លោក ត្រាំ បាននិយាយនៅក្នុងសុន្ទរកថាដ៏សំខាន់លើកដំបូងរបស់ខ្លួន នៅលើវេទិកាពិភពលោក ចាប់តាំងពីការវិលត្រឡប់មកសេតវិមានថា៖« មុនពេលចូលកាន់តំណែង ក្រុមការងាររបស់ខ្ញុំ បានចរចារកិច្ចព្រមព្រៀងបទឈប់បាញ់ នៅមជ្ឈិមបូព៌ា ដែលនឹងមិនកើតឡើង ដោយគ្មានពួកយើងទេ»។

«កាលពីដើមសប្តាហ៍នេះ ចំណាប់ថ្នូរ បានចាប់ផ្តើមត្រឡប់ទៅគ្រួសាររបស់ពួកគេវិញ។ ពួកគេកំពុងតែវិលមកវិញ ហើយនេះ គឺជាទិដ្ឋភាពមួយដ៏ស្រស់ស្អាត ហើយពួកគេ នឹងចូលមកកាន់តែច្រើនថែមទៀត»។

កិច្ចព្រមព្រៀងឈប់បាញ់រវាងអ៊ីស្រាអែល និងក្រុមហាម៉ាស ដែលសម្របសម្រួលដោយសហរដ្ឋអាមេរិក កាតា និងអេហ្ស៊ីប បានចូលជាធរមាន នៅថ្ងៃទី ១៩ ខែមករា ដោយបញ្ចប់ការប្រយុទ្ធគ្នារយៈពេល ១៥ ខែ ដែលបានធ្វើឲ្យប្រជាជនប៉ាឡេស្ទីនជាង ៤៧.៥០០នាក់ បាន។ នេះបើយោងតាមក្រសួងសុខាភិបាល នៅតំបន់ហ្កាហ្សា។

កិច្ចព្រមព្រៀងនេះ ត្រូវបានរៀបចំឡើង ជាច្រើនដំណាក់កាល ដែលជាលើកដំបូងដែលពាក់ព័ន្ធនឹងបទឈប់បាញ់រយៈពេល ៦សប្តាហ៍ ក្នុងអំឡុងពេលដែលក្រុមហាម៉ាស បានយល់ព្រមដោះលែងចំណាប់ថ្នូរ ៣៣ នាក់ ដែលត្រូវបានចាប់ពង្រត់ ក្នុងអំឡុងពេលការវាយប្រហារ កាលពីថ្ងៃទី ០៧ ខែតុលា ឆ្នាំ ២០២៣។