រដ្ឋមន្ត្រីការបរទេសស្លូវេនី កាលពីថ្ងៃព្រហស្បតិ៍ បានអំពាវនាវឲ្យបញ្ចប់សង្រ្គាមរបស់អ៊ីស្រាអែល ប្រឆាំងនឹងក្រុមហាម៉ាស នៅតំបន់ហ្កាហ្សា និងក្រុមហេសបូឡា នៅប្រទេសលីបង់ និងឲ្យមានសន្តិភាព នៅក្នុងតំបន់មជ្ឈិមបូព៌ា។

លោកស្រី Tanja Fajon ក៏បានជំរុញឲ្យប្រទេសជាច្រើនទៀតដើរតាមគន្លងរបស់ប្រទេសខ្លួន ដោយទទួលស្គាល់ប៉ាឡេស្ទីន ជារដ្ឋអធិបតេយ្យ និងឯករាជ្យ ហើយបានអំពាវនាវឲ្យរដ្ឋាភិបាលអ៊ីស្រាអែល ដកកងកម្លាំងចេញពីទឹកដីប៉ាឡេស្ទីន ដែលខ្លួនគ្រប់គ្រង អនុវត្តតាមច្បាប់អន្តរជាតិ និងគោរពធម្មនុញ្ញអង្គការសហប្រជាជាតិ។ .

ការអំពាវនាវរបស់លោកស្រី ទៅកាន់សហគមន៍អន្តរជាតិ បានធ្វើឡើង បន្ទាប់ពីកិច្ចប្រជុំក្រៅផ្លូវការមួយ ដែលដឹកនាំដោយប្រទេសស្លូវេនី ក្នុងតួនាទីជាប្រធានក្រុមប្រឹក្សាសន្តិសុខអង្គការសហប្រជាជាតិ ក្នុងខែនេះ រវាងសមាជិកក្រុមប្រឹក្សា និងអគ្គលេខាធិការ និងក្រុមអ្នកតំណាងផ្សេងទៀតនៃសម្ព័ន្ធអារ៉ាប់។

ក្នុងចំណោមសមាជិក១៩៣នៃអង្គការសហប្រជាជាតិ ១៤៦ ឥឡូវនេះទទួលស្គាល់ជាផ្លូវការនូវភាពជារដ្ឋរបស់ប៉ាឡេស្ទីន។ ប្រទេសស្លូវេនី បានក្លាយជាប្រទេសមួយក្នុងចំណោមពួកគេ នៅក្នុងខែមិថុនា បន្ទាប់ពីការបោះឆ្នោតដែលសមាជិកសភាចំនួន ៥២រូប បានបោះឆ្នោតគាំទ្រ និងគ្មានអ្នកណាជំទាស់ទេ។ ប្រទេសន័រវែស អេស្ប៉ាញ និងអៀរឡង់ បានទទួលស្គាល់ភាពជារដ្ឋប៉ាឡេស្ទីនដូចគ្នា កាលពីខែឧសភា។

លោកស្រី Fajon បាននិយាយថា៖«ខ្ញុំជំរុញឲ្យប្រទេសផ្សេងទៀតធ្វើតាមគំរូរបស់យើង និងទទួលស្គាល់រដ្ឋប៉ាឡេស្ទីន ជារដ្ឋអធិបតេយ្យ រដ្ឋឯករាជ្យ និងផ្តល់ក្តីសង្ឃឹមដល់ប្រជាជនប៉ាឡេស្ទីន»។