បាល់ទាត់៖ ក្រុមភ្នំពេញក្រោនត្រូវឈរចាំគូប្រកួតរបស់ខ្លួនរវាងក្រុមកងយោធពលខេមរភូមិន្ទ (Tiffy Army) ឬក្រុមអគ្គិសនីកម្ពុជានៅវគ្គ ៨ក្រុមចុងក្រោយនៃពានសម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ បន្ទាប់ពីទម្លាក់ក្រុមមន្ទីរអប់រំ យុវជន និងកីឡាខេត្តត្បូងឃ្មុំត្រឹមវគ្គ ១៦ក្រុមដោយលទ្ធផល ៧-០ នៅកីឡដ្ឋាន Smart RSN កាលពីល្ងាចថ្ងៃទី០៩-វិច្ឆិកា។
ជំនួបចាញ់-ធ្លាក់នេះ កីឡាករ ប្រាក់ ធីវ៉ា បានធ្វើសម្រេចគ្រាប់បាល់ Hat-Trick ៣គ្រាប់ម្នាក់ឯងនៅដើមវគ្គទី១ មុនមិត្ដរួមក្រុម សំអុល ទីណា បន្ថែមគ្រាប់នាំមុខទី៤ សម្រាប់រយៈពេល ៤៥នាទីដំបូង។ ចូលវគ្គទី២ ក្រុមម្ចាស់ផ្ទះបានបន្ថែម ៣គ្រាប់ទៀតដោយកីឡាករ សំអុល ទីណា, ជួន ចាន់ចាវ និង រស់ តារ៉ាពេជ្រ ខណៈក្រុមជើងឯករងថ្នាក់ខេត្តត្បូងឃ្មុំពុំមានឱកាសតបតឡើយ។ ជ័យជម្នះនេះធ្វើឲ្យក្រុមសិង្ហក្រហមភ្នំពេញក្រោនបានកក់កៅអីវគ្គ ១/៤ផ្ដាច់ព្រ័ត្រដែលអាចនឹងត្រូវជួបក្រុមកងយោធពលខេមរភូមិន្ទ ឬក្រុមអគ្គិសនីកម្ពុជា ដ្បិតក្រុមទាំងពីរនេះនឹងត្រូវជួបគ្នានៅកីឡដ្ឋានស្ដាតចាស់នាម៉ោង ៣រសៀលនេះក្នុងវគ្គ ១៦ក្រុមចុងក្រោយដើម្បីប្រជែងកៅអីវគ្គ ៨ក្រុម ខណៈក្រុមឈ្នះនឹងត្រូវឡើងទៅជួបក្រុមភ្នំពេញក្រោននាថ្ងៃទី១៦ ខែវិច្ឆិកាខាងមុខ។ ដោយឡែកលទ្ធផលវគ្គ ១៦ក្រុម ១គូទៀតកាលពីម្សិលមិញ គឺក្រុមការពារតំណែងជើងឯកវិសាខាបានយកឈ្នះខេត្តបន្ទាយមានជ័យដោយលទ្ធផល ៨-០ នៅលើទឹកដីរបស់ខ្លួនផងដែរ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
