បើយោងតាមសមាជិកក្រុមប្រឹក្សាភិបាលរបស់ក្រុមហ៊ុន ByteDance គឺលោក Bill Ford បានឲ្យដឹងថា ក្រុមហ៊ុនកំពុងស្វែងរកកិច្ចព្រមព្រៀង ដើម្បីបន្តរក្សាបណ្ដាញសង្គម TikTok ឲ្យដំណើរការនៅសហរដ្ឋអាមេរិក ដោយមិនចាំបាច់លក់ប្រតិបត្តិការរបស់ខ្លួន នៅទីនោះ។

កាលពីថ្ងៃព្រហស្បតិ៍ (ទី២៣ ខែមករា) នៅក្នុងបទសម្ភាសន៍ជាមួយទូរទស្សន៍ Bloomberg អគ្គនាយកក្រុមហ៊ុន លោក Ford បានប្រាប់ថា ក្រុមហ៊ុនចិនកំពុងសម្លឹងដល់មើលជម្រើសនានា សម្រាប់កម្មវិធីបណ្ដាញសង្គមមួយនេះដែលអាចមានពាក់ព័ន្ធនឹងការផ្លាស់ប្តូរការគ្រប់គ្រង ក្នុងស្រុក ដើម្បីធានាបានថា វាអនុលោមតាមច្បាប់របស់សហរដ្ឋអាមេរិក។ 

នៅឯវេទិកាសេដ្ឋកិច្ចពិភពលោក (WEF) នៅទីក្រុង Davos ប្រទេសស្វីស លោកបាននិយាយថា៖ «យើងមានសុទិដ្ឋិនិយមថា យើងនឹងស្វែងរកដំណោះស្រាយមួយបាន។ មានជម្រើសមួយចំនួនដែលយើងអាចនិយាយជាមួយប្រធានាធិបតី លោក Donald Trump និងក្រុមរបស់លោក អំពីដែលថា ក្រុមហ៊ុនអាចបន្តប្រតិបត្តិការ ដោយមិនចាំបាច់លក់ ពោលគឺប្រហែលជាមានការផ្លាស់ប្តូរការគ្រប់គ្រងផ្នែកខ្លះ ប៉ុន្តែមិនលក់ទេ»។

គួរបញ្ជាក់ថា TikTok បានផ្អាកដំណើរការជាបណ្តោះអាសន្ន នៅសហរដ្ឋអាមេរិក កាលពីចុងសប្តាហ៍មុន បន្ទាប់ពីតុលាការកំពូលបានគាំទ្រច្បាប់សន្តិសុខជាតិដែលបង្ខំឲ្យក្រុមហ៊ុនលក់ ឬបើមិនដូច្នោះទេ បិទសេវាកម្ម នៅក្នុងប្រទេស។ បន្ទាប់មក ប្រធានាធិបតីអាមេរិក លោក Donald Trump បានចុះហត្ថលេខាលើក្រឹត្យមួយនៅថ្ងៃចូលកាន់តំណែងដំបូងរបស់លោក ដើម្បីពន្យាពេលកំណត់ សម្រាប់ការលក់នេះ។ ក្រឹត្យនោះផ្តល់រយៈពេល ៧៥ថ្ងៃ ដើម្បីឲ្យក្រុមហ៊ុន ByteDance ដែលបានបដិសេធជាសាធារណៈមិនលក់កម្មវិធីចែករំលែកវីដេអូខ្លីៗដ៏ពេញនិយមមួយនេះ រកដំណោះស្រាយ៕