នាយករដ្ឋមន្រ្តី លោក Viktor Orban នៅថ្ងៃសុក្រ (ទី២៤ ខែមករា) នេះ បាននិយាយថា ប្រទេសហុងគ្រីចង់ឲ្យសហភាពអឺរ៉ុប (EU) បញ្ចុះបញ្ចូលអ៊ុយក្រែនឲ្យចាប់ផ្ដើមឡើងវិញនូវការបញ្ជូនឧស្ម័នឆ្លងកាត់ពីរុស្ស៊ីទៅអឺរ៉ុប ដោយបង្ហាញពីសញ្ញានៃការជំទាស់ដ៏ខ្លាំងក្លា នៅពេលដែល EU ស្វែងរកការពង្រីកទណ្ឌកម្មរបស់ខ្លួនបន្ថែម ប្រឆាំងនឹងរុស្ស៊ី នាសប្តាហ៍ខាងមុខនេះ។

ប្រទេសហុងគ្រីមិនទាន់សម្រេចចិត្តថា តើត្រូវគាំទ្រការដាក់ទណ្ឌកម្មដែលនឹងត្រូវបញ្ចប់ នៅចុងខែនេះដែរ ឬយ៉ាងណានោះទេ។ EU រៀបចំការដាក់ទណ្ឌកម្មថ្មីរៀងរាល់ ៦ខែម្តង ហើយទាមទារឲ្យមានឯកភាព ក្នុងចំណោមប្រទេសសមាជិកទាំង ២៧ ដើម្បីអាចធ្វើដូច្នេះបាន។

នៅថ្ងៃសុក្រនេះ លោក Orban ដែលរដ្ឋាភិបាលរបស់លោកបានបន្តរក្សាទំនាក់ទំនងសេដ្ឋកិច្ច និងនយោបាយកាន់តែជិតស្និទ្ធជាមួយទីក្រុងមូស្គូជាងបណ្តាប្រទេស EU ដទៃទៀតនោះ បានរំលឹកឡើងវិញនូវការរិះគន់របស់លោក ចំពោះការដាក់ទណ្ឌកម្ម ដោយនិយាយថា ការធ្វើបែបនោះបានបង្កការខូចខាតផ្នែកហិរញ្ញវត្ថុចំនួន ១៩ពាន់លានអឺរ៉ូ (១៩,៩ពាន់លានដុល្លារ) ដល់ប្រទេសហុងគ្រី។ លោកមិនបានបញ្ជាក់ថា តើចំនួននេះត្រូវបានគណនាដោយរបៀបណា។

លោក Orban បានប្រាប់វិទ្យុរដ្ឋថា៖ «ឥឡូវនេះ បញ្ហាដាក់ទណ្ឌកម្មថ្មី គឺស្ថិតក្នុងរបៀបវារៈ ហើយខ្ញុំបានជំទាស់ និងបានស្នើឲ្យមេដឹកនាំសហភាពអឺរ៉ុបយល់ថា រឿងនេះមិនអាចបន្តបានទៀតទេ»។ ដោយនិយាយសំដៅលើចំណាត់ការថ្មីៗនេះរបស់អ៊ុយក្រែន ដែលបញ្ឈប់លំហូរឧស្ម័នរុស្ស៊ីទៅកាន់អឺរ៉ុប តាមបំពង់ Druzhba លោក Orban បានបញ្ជាក់ថា៖ «ការធ្វើបែបនេះមិនល្អនោះទេ ដោយយើងត្រូវរងគ្រោះដោយសារជួយអ៊ុយក្រែន។ ហើយពួកគេបង្កបញ្ហាឲ្យយើង។ យើងស្នើឲ្យពួកគេបញ្ចុះបញ្ចូលអ៊ុយក្រែនចាប់ផ្ដើមបញ្ជូនឧស្ម័នឆ្លងកាត់ឡើងវិញ»។

រដ្ឋមន្ត្រីការបរទេស EU នឹងជួបប្រជុំគ្នានៅថ្ងៃចន្ទសប្ដាហ៍ក្រោយ ដើម្បីសម្រេចលើការដាក់ទណ្ឌកម្មថ្មី ហើយរដ្ឋមន្ត្រីការបរទេសហុងគ្រី បានបង្ហាញពីការជំទាស់ខ្លាំងក្លា ដោយនិយាយថា ហុងគ្រីនឹងពិគ្រោះជាមួយដៃគូរបស់សហរដ្ឋអាមេរិកផងដែរ នៅក្នុងប៉ុន្មានថ្ងៃខាងមុខនេះ។ កាលខែធ្នូ ឆ្នាំ២០២៣ លោក Orban បានរារាំងជំនួយរបស់ EU សម្រាប់អ៊ុយក្រែនអស់ជាច្រើនសប្តាហ៍៕